iklan

DILI, POLÍTIKA

PR Horta sei lansa programa modernizasaun ekonomia Timor-Leste iha 2023

PR Horta sei lansa programa modernizasaun ekonomia Timor-Leste iha 2023

Prezidente Repúblika, José Ramos Horta. Imajen Tatoli/Antonio Daciparu.

DILI, 26 setembru 2022 (TATOLI)—Prezidente Repúblika (PR), José Ramos Horta, sei lansa programa modernizasaun ekonomia iha Timor-Leste. Programa ne’e Xefe Estadu sei lansa hamutuk ho Governu, Parlamentu Nasionál ho apoiu hosi líder nasionál, partidu polítiku no organizasaun naun governamentál sira iha tinan 2023.

Notísia Relevante: PR Horta ho Bilionáriu Amerikanu diskute apoiu mídia privada iha Timor-Leste

Programa modernizasaun ekonomia ne’e, sei suporta direta hosi Billionáriu Amerikanu, ne’ebé hanesan na’in ba Fundasaun  Open Society Foundation, George Soros ho nia oan Alex Soros iha Estadu Unidus Amérika, no Xefe Estadu rasik husu ona ba sira, hodi halo estudu modernu, atu ajuda prosesu dezenvolvimentu iha Timor-Leste.

“George Soros hakarak apoia Timor-Leste ba oin, ha’u husu ba sira favór, imi halo dokumentu ida hanesan dalan ida ba modernizasaun Timor-Leste nia ekonomia. Ha’u hakarak lansa (programa) ne’e iha tinan 2023 hamutuk ho Xanana Gusmão, partidu hotu iha parlamentu ita haree oinsá mak rai ne’e atu la’o ba oin,” PR Horta hateten liuhosi komunikadu imprensa ne’ebé Agéncia TATOLI asesu hosi mídia Palásiu Prezidensiál, segunda ne’e.

Antes ne’e, PR Horta hala’o ona enkontru ho reprezentante lideransa  Fundasaun Open Society Foundation, George Soros nia ekipa iha Dili, hodi ko’alia kona-ba programa ne’ebé atu dezenvolve iha Timor.

Timor-Leste tenke avansa ba oin ho prosesu dezenvolvimentu infraestrutura,ekonomia ne’ebé modernu ho teknologia ne’ebé di’ak. Tanba programa ne’e hola parte iha dijitalizasaun  ba ekonomia tomak Timor-Leste nian.

Programa modernizasaun ekonomia ne’e. sei la’o tuir Planu Estratejiku Dezenvolvimentu Nasional (PEDN) 2011-2030 ne’ebé antes ne’e governu anteriór kria no sosializa ona ba povu tomak maibe tuir Horta katak planu hirak ne’e sei haree fila-fali.

“Ita tenke estuda didi’ak Planu Estratejiku Dezenvolvimentu Nasionál (PEDN), planu ne’e sei validu ka lae, parte (programa ou planu) parte hira ona mak Governu iha tinan 10 liuba ka mai ne’e ezekuta ona planu estratejiku ne’e, ou presiza hadi’a,” nia dehan.

Atu moderniza ekonomia Timor-Leste, Horta informa nia parte sei servisu hamutuk ho Governu Timor-Leste atu mantein politika Timor-Leste hodi dada kadoras pipeline hosi tasi Timor ba rai Timor-Leste.

”Polítika Timor-Leste nian mak dada kadoras ba Timor-Leste,” Horta hateten.

Atu mantein polítika dada kadoras ba Timor-Leste, Horta dehan, Líder Nasionál, Kay Rala Xanana Gusmão mós halo ona enkontru ho Ministru Negosiu Estranjeru Austrália, Penny Wong iha Nova Iorke hodi reafirma pozisaun Timor-Leste nian.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!