iklan

EDUKASAUN, HEADLINE, MUNISÍPIU, VIQUEQUE

Eskola EBC 07 Uatulari menus livru lian portugés

Eskola EBC 07 Uatulari menus livru lian portugés

Estudante sira iha Eskola EBC 07 Uatulari partisipa iha aula prezensiál, tersa (27/09). Imajen Tatoli/Vitorino Lopes da Costa

VIQUEQUE, 27 setembru 2022 (TATOLI)—Eskola Ensinu Báziku Sentrál (EBC, sigla portugés) 07 Uatulari, munisípiu Viqueque, durante tinan-rua resin ona, menus livru matéria lian portugés hodi profesór sira utiliza hanorin estudante klase 3.

“Uluk iha livru 10 resin maibé uza tinan naruk ona ne’ebé livru sira nakles hotu ona no balun estudante empresta to’o la lori mai eskola,” Adjuntu Diretór Eskola EBC 07 Uatulari, Paulo Hornai, hateten iha ninia knaar fatin, tersa ne’e.

Daudaun hela livru rua maka profesór sira uza hodi hanorin estudante no Ministériu Edukasaun Juventude no Desportu (MEJD) oferese sumáriu portugés ba eskola hodi profesór sira uza hanorin.

“Ami hato’o beibeik preokupasaun ne’e ba Servisu Edukasaun Munisipál, maibé to’o agora laiha resposta ruma,” nia akresenta.

Notísia relevante: MEJD sei distribui livru millaun rua eskola iha territóriu nasionál

Livru ba estudante klase I to’o II sufisiente, maibé livru portugés ba klase III maka limitadu liu.

“Ami mós hato’o ona preokupasaun ne’e ba Vise-Mininistru Edukasaun Juventude no Desportu, António Guterres, ho ninia ekipa sira ne’ebé foin lalais mai vizita ami-nia eskola, maibé to’o agora seidauk fó resposta ruma. Maski livru limitadu maibé ami kontinua esforsu hodi hanorin estudante tuir kbiit, tanba ne’e ha’u husu ministériu se bele prodús ona livru portugés hodi inísiu fulan-janeiru ne’e livru bele iha ona,” Adjuntu Diretór tenik.

Aleinde ne’e, nia fó sujestaun ba entidade relevante sira kria biblioteka eskola hodi estudante sira bele asesu livru.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!