Konfrontu iha Santa Cruz, PNTL detein ona joven nain rua
DILI, 27 setembru 2022 (TATOLI)-Polísia Nasionál Timor-Leste (PNTL), detein ona joven nain rua ba kazu tuda malu ne’ebé akontese segunda, (26/9) kalan iha área Santa Cruz, postu administrativu Nain Feto, munisípiu Dili.
Tuda malu ne’e mosu, tanba provokasaun entre joven nain. “Ita nian parte patroli eskuadra Nain- Feto tún kedan hodi halo intervensaun ba situasaun ne’e, no detein suspeitu nain rua ho inisiál P ho H”, Komandante PNTL Munisipiu Dili, Superentidente Xefe Henrique da Costa, ba TATOLI via telefone, tersa ne’e.
Nia hateten, joven nain rua ne’e submete ona ba prosesu identifikasaun iha polísia eskuadra Nain–Feto. Efeitu hosi tuda malu ne’e, estraga vendedór ida ne’ebé faan nia sasan besik área ne’ebá no polísia eskuadra Nain-Feto simu ona keixa.
Komadante Henrique mós informa tuda malu ne’ebé akontese iha tuku 22:00 iha área Hudi-Laran Gan 45, suku Bairru Pité rezulta membru Konsellu Polisiamentu Komunitáriu (KPK) ida hetan tuda iha ulun bainhira atua situasaun. “Ita mós identifika ona suspeitu balun ba akontesementu ne’e, tanba membru KPK rasik dehan koñese. Ita mós halo apreensaun ba motor ida hodi prova ba evidensia”, akresenta.
Notísia relevante: Membru PNTL tenke hamutuk ho komunidade asegura seguransa iha bairru
Jornalista : Natalino Costa
Editora : Rita Almeida
