iklan

NASIONÁL, DILI, MUNISÍPIU, POLÍTIKA, SEGURANSA

Membru PN husu PNTL investiga kazu tiru-mate karau iha Natarbora

Membru PN husu PNTL investiga kazu tiru-mate karau iha Natarbora

Vise Prezidente Parlamentu Nasionál Deputada Maria Angelina Lopes Sarmento.Imajen/TATOLI

DILI, 27 setembru 2022 (TATOLI)—Deputadu menbru Parlamentu Nasionál (PN), husu Polísia Nasionál Timor-Leste (PNTL) atu investiga kazu tiru-mate abitante ida-nian karau iha postu administrativu Natarbora, munisípiu Manatuto foin lalais.

Notísia Relevante: Kazu tiru-mate karau iha Dotik sei hein relatóriu ekipa konjunta

“Horsehik Komandante Jerál fó sai ona iha mídia katak nia orienta ona ekipa ida atu halo investigasaun ba akontesimentu ne’e hein katak bele responde buka investiga to’o hetan ema-ne’ebé mak grupu organizadu ruma ba halo asaltu ba ema-nia toos no ema-nia animál ne’ebé haki’ak kuidadu ho enérjia hanesan osan reseita ba família,” Vise Prezidente Parlamentu Nasionál, Maria Angelina Sarmento, hato’o liuhosi reuniaun plenária iha Parlamentu Nasionál, tersa ne’e.

Informasaun hosi komunidade ba akontesimentu ne’e iha rai ida naran Wekmodok-Natarbora, grupu deskuñesidu ida ba asalta ema-nia toos no tiru mate populasaun ida ninia karau iha nia toos hamutuk iha karau tolu, rua lori halai tiha ida mak husik hela.

‘’Toos na’in toman duni grupu ne’e no grupu ne’e ba duni ho karreta Pick-Up ida hodi halo asaltu ka tiru karau.” Deputada PLP ne’e hateten.

Deputada Frente Mudansa, Isabela Ximenes, hateten iha loron 23 setembru ne’e mosu akontesimentu ne’e iha suku Aubeon-Natarbora, no akontesimentu refere uluk akontese ona mós iha munisípiu seluk maibé agora situasaun ne’e kontinua nafatin.

“Problema mak ne’e, sé mak ka’er kilat. Ita hatene só entidade forsa balun sira mak iha autoridade autoriza kaer no agora se kestaun ida-ne’e iha mós ema utiliza kilat ba tiru animál no na’ok hosi populasaun sira. Ha’u sente preokupante, ita tenke haree kona-ba regra ba utilizasaun arma no sorin seluk ba na’ok ema-nia sasán no oho animál sira seluk,” nia dehan.

Ba dadaun ne’e, abitante vítima hato’o ona keixa ba autoridade seguransa, nune’e reprezentante povu iha PN husu ba parte relevante atu halo investigasaun didi’ak hodi situasaun ne’e labele akontese beibeik, tanba komunidade haki’ak animál sakrífika tempu, loloos sira mak hetan aproveita maibé ema na’ok tiha.

Notísia Relevante: Komandu Jerál PNTL orienta ona ekipa investiga kazu tiru mate karau iha Natarbora

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!