iklan

BOBONARO, HEADLINE, MUNISÍPIU, SEGURANSA

PDHJ Maliana no instituisaun relevante sei kontrola veíkulu estadu iha outubru

PDHJ Maliana no instituisaun relevante sei kontrola veíkulu estadu iha outubru

Diretór PDHJ Territoriál Bobonaro, Domingos Pinto Tavares. Imajen Tatoli/Sérgio da Cruz.

BOBONARO, 27 setembru 2022 (TATOLI)-Provedoria Direitu Umanu no Justisa (PDHJ), delegasaun territoriál Maliana, serbisu hamutuk ho instituisaun relevante sei halo pasa revista hodi kontrola viatura estadu nian iha fulan-outubru tinan 2022.

Diretór PDHJ delegasaun territoriál Maliana, Domingos Pinto Tavares, hateten, ekipa ne’e sei envolve Komisaun Anti Korrupsaun (CAC sigla portugés), Polísia Nasionál Timor-Leste (PNTL) komandu munisípiu Bobonaro no Diresaun Transporte Terrestre (DTT) munisípiu Bobonaro.

Notísia relevante: Governu altera dekretu-lei regulamentu veíkulu Estadu

Atividade pasa revista atu kontrola veíkulukulu estadu ne’ebé movimenta iha munisípiu Bobonaro la tuir regra ho baze ba sirkulár númeru 01/VIII/GM-MF/2022-01 ne’ebé fó-sai hosi Ministériu Finansa, iha sesta loron 14 fulan-fevereiru tinan 2022, katak kargu xefia sira iha instituisaun públiku tenke estasiona iha eskritóriu.

Domingos hatutan, maske regra hirak-ne’e hatuur klaru ona, maibé iha funsionáriu barak mak sei nafatin kontra tanba foin lalais ne’e mós PDHJ simu informasaun hosi komunidade sira katak, iha funsionáriu uza patrimóniu estadu ba fali jogu tradisionál futu-manu.

“Ita buka atu oinsá serbisu hamutuk institusionál ho PNTL no KAK atu nune’e ita bele iha ekipa intervensaun konjunta ida oinsá minimiza asaun ka hahalok sira-ne’ebé maka fó prejuizu ba gastu estadu nian, ne’ebé kontinua halo komunidade la fiar katak lei ne’e iha, maibé lei ne’e iha só ké ema mak la kumpre,” nia informa ba Jornalista sira, iha Maliana, tersa ne’e.

Maibé nia dehan, atu implementa planu ne’e ba dahuluk sei koordena ho instituisaun relevante sira kuaze fulan ida, tau ideia hamutuk oinsá prepara planu no estratéjia sira atu nune’e iha fulan outubru nia laran ekipa sira bele halo kontrola másimu iha terrenu.

Diretór ne’e akresenta, pasa revista ne’e sei realiza iha fulan-outubru nia laran halo prevensaun hotu kedas atubele konsiensializa estidade estadu sira hosi institusaun estadu nune’e bele kompriende baze legál.

Nia fó-sai katak, ekipa ida sei konsentra iha Batugade, postu administrativi Balibo tanba área ne’e maka hanesan poténsia iha fronteira.

Nune’e mós nune’e ekipa ida sei koloka iha kruzamentu tolu suku Oe-leu, postu administrativu Bobonaro nune’e bele kobre hotu postu administrativu Bobonaro no Lolotoe.

Nia apela ba kargu xefia no funsionáriu sira iha instituisauun estadu hotu atu kumpre nafatin regra ne’ebé fó-sai ona no bainhira hakarak utiliza patrimóniu estádu iha loron feriadu tenke aprezenta karta autorizasaun hosi instituisaun.

Notísia relevante: Hahú ohin, veíkulu Estadu “para” iha eskritóriu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!