Governu aprova dekretu-lei rua hosi MS
DILI, 28 setembru 2022 (TATOLI)—Ministra Saúde (MS), Odete Maria Freitas Belo, aprezenta dekretu-Lei rua iha reuniaun Konsellu Ministru (KM) no hetan ona aprovasaun, kuarta ne’e, kona-ba ezersísiu profisaun saúde no karreira profisionál saúde.
“Ho alterasaun ida-ne’e, hakarak atu alkansa aumentu grau ezijénsia hodi hetan sédula profisionál, profisionál saúde sira ne’ebé kualifikadu liu, kualidade ne’ebé a’as liu hosi kuidadu saude sira ne’ebé fó ba populasaun no konfiansa boot liu iha kualidade téknika no deontolójika hosi profisionál sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu.
Notísia relevante: 2002 to’o 2022, MS rekruta ona profisionál saúde na’in- 5.525
Projetu dahuluk ho objetivu atu halo alterasaun datoluk ba dekretu-Lei númeru 14/2004, loron 01 setembru ho redasaun ne’ebé fó hosi dekretu-lei númeru 40/2011 loron 21 setembru no 4/2019 loron 13 marsu, kona-ba ezersísiu profisaun saúde nian.
Enkuantu, projetu daruak iha ninia objetu alterasaun dahuluk ba dekretu-lei númeru 13/2012 loron 07 marsu, kona-ba karreira profisinál saúde nian.
Objetivu hosi projetu ne’e atu dignifika no valoriza profisionál saúde sira, liuhosi karreira ne’ebé marka ho etapa ezijente formasaun pós-graduda jerál no espesializada, maibé mós objetu rekoñesimentu institusionál, liuhosi mekanizmu legál ne’ebé permite progresu no promosaun justa no ekitativa.
Jornalista : Antónia Gusmão
Editora : Julia Chatarina
