DILI, 28 setembru 2022 (TATOLI)–Ministru Obra Publika (MOP), Abel Pires da Silva no Prezidente Konsellu Administrasaun Bee Timor-Leste, Empreza Públika (BTL, E.P), Carlos Peloi dos Reis, halo aprezentasaun ida iha reuniaun Konsellu Ministru (KM), kuarta ne’e, kona-ba implementasaun akordu entre Timor-Leste no Millennium Challenge Corporation (MCC) iha área bee, saneamentu no drenajen sira.
Ministru Prezidénsia Konsellu Ministru, Fidelis Manuel Leite Magalhães, hateten, komponente ne’e tama iha akordu kooperasaun ne’ebé asina ona ho MCC, iha loron 19 jullu 2022, ho objetivu atu hamenus kontaminasaun bee moos no bee rai-okos, ne’ebé kauza ba moras no impede moris di’ak, saúde labarik no adultu sira.
“Projetu ne’e inklui konstrusaun fábrika ida ba produsaun dezinfetante kímiku ba sistema abastesimentu bee sidade nian, konstrusaun hosi sistema sentrál dahuluk bee reziduál nasaun nian, hadi’a rede drenajen ba kapitál Dili no ba munisípiu viziñu haat hanesan Liquiçá, Manatuto, Ermera, no Aileu. Tuir programa ne’e sei realiza mós reforma polítika no institusionál sira, no mós mudansa sosiál no komportamentu hodi hadi’a sistema sanemanetu báziku no jestaun bee ba nível doméstiku,” Portavóz Governu ne’e relata hafoin reuniaun ezekutivu, iha Palásiu Governu.
Notísia relevante: BTL mellora sistema abastesimentu bee no saneamentu hodi rekolla reseita
Komponente bee, saneamentu no drenajen sira, aleinde fó impaktu diretu ba saúde sidadaun nian, maibé mós sei atua hodi hamenus risku inundasaun, ne’ebé Timor-Leste hasoru ona iha tinan hirak ikus ne’e hodi evita ninia impaktu ambientál sira no sosiu-ekonómiku hodi asegura jestaun sustentável bee no saneamentu.
“Estima katak atividade tratamentu bee sei benefisia ema 429.000 hosi munísipiu Dili no 64.000 fora hosi Dili. Projetu saneamentu ne’e sei benefisia ema 106.000 hela iha Dili no tuir planu mestre prvee katak to’o tinan 2036 benefisia ema liu 300.000 hosi kapitál,” nia akresenta.
Komponente tolu ne’e sei iha investimentu hamutuk millaun $372,2, ho atividade tratamentu bee ho kustu millaun $8,3, iha sistema saneamentu sei uza millaun $342,8 no sistema drenajen nian ho kustu millaun $8,9.
Projetu ne’e mós sei inklui besik millaun $7 ba fortalesimentu institusionál no reforma regulatóriu no millaun $5,2 ba kampaña alterasaun sosiál no komportamentál.
Jornalista : Antónia Gusmão
Editora : Julia Chatarina
