iklan

HEADLINE, MUNISÍPIU, VIQUEQUE

KHC Viqueque fó formasaun no apoiu materiál ba grupu ortikultura 57

KHC Viqueque fó formasaun no apoiu materiál ba grupu ortikultura 57

Inan-feton sira ne’ebé halibur iha grupu ortikultura kuu hela modo. Imajen Tatoli/Vitorino Lopes da Costa

DILI, 28 setembru 2022 (TATOLI)–Organizasaun Naun Govermentál (ONG) K’nua Haberan Komunidade (KHC) munisípiu Viqueque fó apoiu ba grupu ortikultura 57 hodi hasa’e ekonomia família.

“Ami fó apoiu formasaun no materiál ortikultura iha suku sira iha postu tolu,” Diretór Ezekutivu Fundasaun KHC, Agusto Pinto, hateten, ba Agência Tatoli, iha ninia knaar fatin Beobe, kuarta ne’e.

Formasaun kona-ba halo adubu orgánika, métodu kuda modo no apoiu modo musan ba grupu sira kuda.

“Hosi grupu 57 ne’e ami monitoriza grupu balun sira-nia produtu ortikultura hahú fa’an ona. Apoia ne’ebé ami fó bolu to’os uma hun, ho kuantidade  kiik maibé oinsá maka responde ba membru grupu sira-nia nesesidade loron-loron,” nia akresenta.

Notísia relevante: KHC entrega konservasaun bee-matan ba abitante aldeia Bahafou Viqueque

KHC sei organiza di’ak liután hodi hasa’e produsaun ortikultura ho kuantidade boot atu asesu ba merkadu lokál no merkadu nasionál.

“Ami planu ona ba oin ne’e koko organiza grupu sira hodi haboot produsaun ortikultura nune’e sira bele lori produtu ba asesu merkadu lokál no merkadu nasionál. Ida-ne’e mak ami-nia hanoin no ami sei koordena ho ema,” nia tenik.

KHC mós hakarak halo koordenasaun ho parte Governu liuhosi Ministériu Turizmu Komérsiu no Indústria (MTKI) hodi grupu sira bele asesu ba merkadu nasionál, tanba ida-ne’e hanesan planu ba sustentablidade grupu.

“Ha’u husu ba grupu sira hasa’e kuantidade produsaun hodi responde ba merkadu lokál sira iha munisípiu Viqueque. Ba oin ami sei aumenta grupu ortikultura tanba ami iha parseiru rua ne’ebé fó apoiu ba grupu sira,” nia hato’o.

Durante ne’e Governu liuhosi Ministériu Agrikultura no Peska (MAP) iha munisípiu Viqueque fó apoiu extensionista maka fó formasaun no apoiu grupu 57.

“Ami tenta ona MAP Viqueque hodi apoiu grupu sira hasa’e kualidade produsaun no ajuda buka merkadu ba ita-nia grupu ortikultura sira,” Koordenadór dehan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!