DILI, 28 setembru 2022 (TATOLI)—Ministra Solidariedade Sosiál no Inkluzaun (MSSI), Armanda Berta dos Santos, hateten subsídiu fim do ano $200 ba uma kain sei lansa iha 16 novembru tinan ne’e.
Notisia Relevante: Preparasaun subsídiu $200 ba uma kain atinje ona 75%
“Iha 16 novembru sei lansa subsídiu fim do ano $200 ba uma-kain, ita halo fulan klaran, nune’e iha fulan-dezembru bele ramata tanba buat ne’e liga ho dadus entaun presiza lansa sedu,” Armanda Berta dos Santos dehan ba jornalista sira, hafoin partisipa reuniaun Konsellu Ministru, iha resintu Palásiu Governu, Dili, kuarta ne’e.
Governante ne’e hateten, pagamentu ba subsídiu fim do ano $200 ba uma kain ne’e karik sei iha reklamasaun, entaun hanoin halo kedas pagamentu sedu, nune’e bele haree kestaun hirak ne’e.
Nia informa, daudaun ne’e Ministériu Adminitrasaun Estatál (MAE) submete ona dadus uma-kain 39.110 ba Mnistériu Solidariedade Sosiál no Inkluzaun.
“Ita simu dadus uma-kain hosi hamutuk 39.110 ho nia osan ne’ebé prevee millaun $700. Subsídiu ne’e universalmente katak uma kain hotu-hotu iha territóriu nasionál sei hetan subsídiu ne’e,” nia relata.
Iha dekretu-lei 37/2022, 25 maiu, kona-ba (Subsidiu de Fim de Ano Aos Uma Kain) iha artigu 1 alinea 2 ne’e hateten subsidiu fim do ano ba uma kain ne’ebe mak vulneravel liu iha Timor – Leste.
lha dekretu-lei ne’ebé hanesan, iha fali artigu 2 ne’e haktuir benefisiáriu ba subsídiu anuál ne’e ba uma kain sira-ne’ebé rejistu ona no iha “Livru Rejistu Uma Kain” iha suku ida iha territóriu nasionál ne’ebé previstu ona iha Diploma Ministeriál Númeru 49.2017, 2 agostu.
Notisia Relevante: Subsídiu $200 ba uma kain, MAE simu dadus provizóriu rihun 400-resin
Jornalista : Osória Marques
Editór : Cancio Ximenes
