DILI, 29 setembru 2022 (TATOLI)—Implementasaun programa merenda eskolár ba estudante hamutuk 41.000 resin iha nível pre-eskolár no nível ensinu báziku iha munisípiu Ermera sei hahú filafali iha segunda semana ne’e.
Diretór Servisu Edukasaun Munisípiu Ermera (DSEME), Eduardo Martins, hateten, programa merenda eskolár seidauk hahú tanba iha fallansu balun maibé garante katak sei hahu filafali.
“Ita-nia implementasaun programa merenda eskolár loloos ba fulan-tolu, iha agostu, setembru no outubru maibé falla tiha. Ita sei hahú filafali iha inísiu outubru,” Diretór informa ba Agência Tatoli via telefónika, kinta ne’e.
Notísia relevante: Merenda eskolár ba estudante 14.745 iha Manufahi ho kustu $206.162,50
Programa nasionál ne’e hahú hosi inísiu janeiru to’o ohin loron laiha problema, buat hotu la’o di’ak, maibé fulan-tolu ba oin maka sei hahú iha outubru ho ninia orsamentu alokadu hosi Ministériu Administrasaun Estatál (MAE) hamutuk $533.800.
“Ami kumpre nafatin menu ne’ebé deside ona hosi Governu liuhosi Ministériu Saúde. Ita-nia implementasaun menu laiha problema. Maibé ninia implementasaun maka dala ruma la hanesan ho eskola sira iha munisípiu sira seluk,” nia tenik.
Totál eskola iha Ermera ne’ebé sei hetan merenda eskolár ne’e kuaze eskola públiku de’it ne’ebé hamutuk 118.
Jornalista : Tomé Amado
Editora : Julia Chatarina
