DILI, 29 setembru 2022 (TATOLI)-Arguidu António da Costa eis Diretór Jerál (DJ) Indústria no Kooperativa, Ministériu Turizmu, Komérsiu, Indústria no Ambiente (MTCIA, sigla portugés) iha governasaun da-neen deklara ba tribunál, katak projetu akizasaun ba makina produsaun resiklajen, kompañia hato’o proposta ne’e direta ba arguidu Constancio Pinto, eis ministru MTCIA.
“Ha’u hanesan Diretór Jerál iha koñesimentu kona-ba proposta hosi kompañia, maibé proposta ne’ebé arguidu José Deolindo Ximenes, Diretór ba kompañia Star Product Unipessoál Lda, submete direitamente ba ministru iha momentu ne’ebá”, arguidu haktuir iha sala julgamentu Tribunál Distritál Dili (TDD), ohin.
Nia dehan proposta ne’e relevante ho planu ministériu-nian konaba atividade zero plástiku. “Tanba ne’e, ministru mak iha kompeténsia atu deside, hanesan ema tékniku halo tuir de’it”. Hatutan tan: “ministériu momentu ne’ebá la halo anúnsiu ba públiku para kompañia seluk bele konkore, tanba kompañia Star Product Unip, Lda nia atividade mak halo resiklajen”.
Notísia relevante: Constancio Pinto sai arguidu ba kazu partisipasaun ekonómika
Arguidu seluk ba kazu ne’e ho krime partisipasaun ekonómika iha negósiu tuir akuzasaun ministériu públiku mak nain ba kompañia Star Product Unipessoál Lda, José Deolindo.
Perante audénsia, arguidu António da Costa dehan faktu ne’ebé deskreve iha akuzasaun balun loos no balun la-loos.
Fundu subvensaun ne’ebé atu halo atividade sosiál, utiliza fali ba programa resiklajen. “Ita hatene resiklajen ne’e fó benefísiu no importante ba populasaun, tanba iha kompañia ida maka intensaun di’ak atu halo produsaun resiklajen husi materiál plástiku, tanba bainhira udan bo’ot iha Dili laran, akontese inundasaun iha fatin-fatin kauza husi fo’er, halo valeta sira intupidu”, hatutan.
Nia dehan tan, hafoin selebra kontratu, kompañia halo atividade produsaun resiklajen sem supervizaun, maibé ministériu kontinua halo pagamentu no ninia finalidade mak kompañia ne’e la konsege finalize produsaun resiklajen, tanba rai ne’ebé kompañia utiliza, iha hela disputa.
“Ha’u iha koñesimentu katak kompañia ne’e la finaliza sira nia projetu tuir kontratu tanba hetan problema. Kompañia ne’e mós laiha relatóriu, maibé ministru la foti sansaun ruma hasoru kompañia ne’e”, António da Costa hateten.
Hafoin rona deklarasaun ne’e, tribunál adia julgamento ba loron 12 outubru hodi kontinua rona deklarasaun arguidu Constancio Pinto.
Julgamentu ne’e prezide husi juiz José Gonçalves, Argentino Nunes no Alvaro Maria, prokuradora Lidia Soares, arguidu sira hetan asisténsia legál husi defensór públiku no advogadu privadu.
Jornalista : Natalino Costa
Editora : Rita Almeida
