iklan

HEADLINE, MUNISÍPIU, VIQUEQUE

Kooperativa Hamaifor prodús mina-sona iha Viqueque

Kooperativa Hamaifor prodús mina-sona iha Viqueque

Produtu mina-sona hosi kooperativa Hamaifor. Imajen Tatoli/Vitorino Lopes da Costa

VIQUEQUE, 29 setembru 2022 (TATOLI)–Kooperativa Hamaifor hosi suku Bahalara-Uain, postu Viqueque, munisípiu Viqueque, prodús mina-sosa ho materiál prima nuu.

“Kuaze mina-sona iha kooperativa Viqueque sira tau hotu naran mina Vinovi tanba ami hetan apoiu no formasaun hosi organizaun Adra. Ami hahú prodús tein mina-nuu iha ami-nia sede kooperativa iha Bahalara-Uain iha maiu 2022 to’o agora. Ami-nia produtu mina-sona ne’e daudaun to’o ona merkadu no balun ami fa’an ba komunidade iha munisípiu Viqueque,” Xefe Komité kréditu iha Hamaifor, Anaceto Tilman Belo, hateten ba Agência Tatoli, iha suku Bahalara-Uain, kinta ne’e.

Jerente kooperativa Hamaifor antes ne’e haruka ninia membru na’in-hitu hodi tuir formasaun iha organizasaun Adra, nune’e hafoin formasaun ramata hahú prodús mina-sona hodi fa’an.

“Hosi rezutadu produsaun ne’e, kooperativa Hamifor konsege rekolla rendimentu $500, ne’ebé antes ne’e ami-nia mina-sona kada litru 5 fa’an $10,50, maibé agora ami hanoin atu redús ninia presu ba $8. Baibain ami fa’an ba komunidade no balun fa’an ba loja sira iha Dili,” nia akresenta.

Notísia relevante: SEKoop kapasita membru kooperativa uniaun kréditu Viqueque

Kada loron kooperativa prodús mina-sona litru 25, maibé depende ba nuu fuan tanba kooperativa sosa fali hosi grupu no komunidade lokál.

“Ami mós agora hadi’a hela kondisaun fatin produsaun tanba bele afeta ba saúde. Tanba ne’e, ita mós presiza kria kondisaun fó espasu ba produsaun hodi garante saúde no ijene,” nia tenik.

Maski nune’e, membru kooperativa sira sei menus fasilidade hodi halo produsaun.

“Ha’u sente nuu iha Viqueque sei sufisente hodi halo produsaun mina-sona, maibé difikuldade ne’ebé ami hasoru maka fasilidade limitadu hodi halo produsaun. Liuhosi produsaun sira-ne’e ita bele fó oportunidade ba ita-nia maluk sira hodi rekupera ekonomia,” nia dehan.

Aleinde ne’e, kooperativa lokál ne’e iha mós produtu seluk hanesan cokolate (kakau), foremungu no seluk tan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!