iklan

EDUKASAUN, HEADLINE

MEJD no UNTL kontinua hametin kooperasaun iha área formasaun profesór

MEJD no UNTL kontinua hametin kooperasaun iha área formasaun profesór

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 29 setembru 2022 (TATOLI)–Ministériu Edukasaun Juventude no Desportu (MEJD) hamutuk ho Universidade Nasionál Timor-Lorosa’e (UNTL) halo akordu kooperasaun iha área edukasaun atu kontinua realiza formasaun ba profesór sira iha nível baxarelatu, lisensiatura no programa pos-graduasaun.

Ministru Edukasaun Juventude no Desportu, Armindo Maia, relata katak akordu ne’ebé parte rua asina la’ós foin ba dahuluk maibé akordu ne’e nu’udar pasu kontinuasaun de’it hosi akordu ne’ebé halo ona.

“Universidade Nasionál Timor-Lorosa’e nu’udar parseiru estratéjiku iha area edukasaun no formasaun, tanba ne’e ministériu hakarak mellora kooperasaun hodi bele responde ba nesesidade formasaun rekursu umanu kualifikadu ba profesór sira. Ita presiza profesór kualifikadu atu nune’e bainhira ko’alia kona-ba edukasaun ho kualidade maka ita bele aposta iha área formasaun profesór,” Ministru hateten iha salaun edifísiu MEJD, Vila Verde, kinta ne’e.

Notísia reelevante: Profesór 170 partisipa formasaun siénsia naturál no matemátika

Aleinde ne’e, iha área peskiza sientífika atividade akadémika, semináriu interkámbiu no atividade kulturál sira.

Iha biban hanesan, Reitór UNTL, João Soares Martins, relata, akordu ne’e importante ba instituisaun rua atu nune’e bele haree modalidade di’ak hodi bele ezekuta prosesu kooperasaun ne’e.

“Akordu ne’e la haree de’it ba formasaun iha nível baxarelatu maibé sei haree mós ba nível lisensiatura no pos-graduasaun inklui servisu peskiza no estensaun komunitária nian. Ami iha UNTL tau interese boot ba akordu ne’e tanba ami iha fakuldade edukasaun arte umanidade (FEAH) ne’ebé halo mós formasaun ba profesór sira. Estudante sira iha fakuldade ne’e sempre utiliza eskola sira hodi hala’o estájiu. Tanba ne’e atu iha legalidade no lejitimidade presiza iha duni kooperasaun hanesan ne’e,” nia akresenta.

Alende ne’e, UNTL mós iha fakuldade siénsia ezata ne’ebé maka halo formasaun ba área matemátika, fízika no kímika, ne’ebé área hirak ne’e importante iha nasaun Timor-Leste no fó vantajen ba UNTL no MEJD atubele reforsa kooperasaun.

Jornalista   : Tomé Amado

Editora         : Julia Chatarina

iklan
iklan

Leave a Reply

iklan
error: Content is protected !!