DILI, 29 setembru 2022(TATOLI)-Ministériu Públiku (MP), kinta ne’e liuhosi julgamentu iha Tribunál Distritál Dili, alega arguidu António da Conceição ‘Kalohan’ nu’udar eis-ministru ho pena kadeia tinan lima ba krime partisipasaun ekonómika iha negósiu inklui administrasaun danoza.
Prokuradór Rogério Viegas husu ba juiz sira iha sala julgamentu atu aplika pena komarka tinan lima ba António da Conceição, tanba faktu sira ne’ebé MP akuza, bazea ba deklarasaun hosi testamuña sira. “Husu atu kondena arguidu ho pena únika tinan lima prizaun no absolve krime pekulatu, tanba arguidu responsabiliza ona aktu ne’e (pekulatu)”, katak nia.
Notísia relevante: Deputadu ‘Kalohan’-funsionáriu MKIA submete ba julgamentu
Ministériu Públiku mos akuza arguidu António da Costa nu’udar autór konsumadu ho krime pekulatu tuir artigu 295 númeru 1) kódigu penál ho pena prizaun tinan tolu to’o 10, maibé husu atu absolve tanba responsabiliza ona ba aktu ne’e.
Alegasaun ne’e; Julmira Belo, António da Costa, Gaspar Policarpo Correia no Kalohan hanesan ko-autór ba krime partisipasaun ekonómika iha negósiu tuir artigu 299 númeru 1 no 2) ho moldurál pena tinan tolu to’o 10 komarka. Alega mós ho krime administrasaun danoza, artigu 274 númeru 2) ho moldurál pena prizaun tinan rua to’o neen. Maibé, prokuradór husu ba tribunál atu aplika prizaun tinan haat kadeia.
Paulo Manuel da Costa Soares Viana nu’udar autór krime administrasaun danoza ne’ebé previstu 274 númeru 2 ho moldurál penál komarka tinan rua – neen no krime burla agravada, iha artigu 266 no 267 númeru 1 ho pena prizaun tinan tolu to’o 10.
Relativamente prejuisu Estadu ho montante globál tuir kontratu ninian valór USD 191,000.00, ministériu públiku husu ba tribunál atu arguidu sira, solidariamente devolve ba Estadu durante tinan 10, hahú hosi desizaun tribunál tránzitu ho julgada.
Enkuantu, defeza husi arguidu António da Costa, advogadu privadu, Pedro Camões, konsidera akuzasaun ba ninian kliente laiha fundamentu no falsa, tanba ne’e husu ba tribunál atu absolve.
Arguidu sira ne’e funsionáriu públiku iha Ministériu Komérsiu, Indústria no Ambiente (MKIA), asume kargu xefia.
António da Costa nu’udar diretór nasionál ba indústria no transformadora, Julmira Inacia Belo hanesan xefe departamentu lojístika nasionál, Gaspar Policarpo da Silva Correa nu’udar diretór nasionál ba aprovizionamentu no lojístika.
Enkuantu, arguidu Paul Manuel da Costa Soares Viana, nu’udar diretór husi kompañia Kninuk Star Unipesoal Lda no Antonio da Conceição nu’udar ministru, agora daudaun membru Parlamentu Nasionál hosi bankada Partidu Demokrátiku.
Arguidu sira ne’e iha 2014 uza orsamentu Estadu ho montante globál $200,000.00, sosa ekipamentu hanesan test kids ba laboratóriu, test ba ethanol, mákina pakote ba kafé; mákina sona kafé, fasilidade ba sentru treinamentu iha Matadoru, no programa formasaun.
Durante prosesu ezekusaun, ekipamentu balu hatama tarde, medida la hanesan, sasán seidauk tama hotu, halo uluk pagamentu. Tanba ne’e, ministériu públiku konsidera arguidu sira fó prejuizu ba Estadu ho montante USD 143,500.00.
Atu prova alegasaun ne’e, prokuradór husu ba juiz halo inspesaun hodi haree sasán sira ne’ebé konsidera fó prejuizu ba Estadu. Prosesu inspesaun ne’ebé halo iha Matadouru, juiz koletivu akompaña hosi prokuradór, defeza no arguidu sira.
Julgamentu ne’ebé prezide husi juiz Ana Paula, Maria Solana, Ivan Suritai, ministériu públiku reprezenta husi prokuradór Rogério Viegas, arguidu sira hetan asisténsia legál husi advogadu privadu no defensór públiku.
Tribunál deside adia julgamentu ba loron 6 fulan-outubru tinan ne’e hodi kontinua rona alegasaun husi defeza ba arguidu sira seluk.
Jornalista : Natalino Costa
Editora : Rita Almeida
