BOBONARO, 29 setembru 2022 (TATOLI)—Sekretariadu Tékniku Administrasaun Eleitorál (STAE), munisípiu Bobonaro, rejista dadus provizóriu eleitór foun hamtuk na’in-6.289 liuhosi atividade resensiamentu eleitorál.
Diretór STAE munisipíu Bobonaro, Mariano Viegas Amarál, esplika, eleitór tuan ne’ebé rejista iha tinan 2021 hamutuk na’in-70.283, komposta hosi mane na’in-36.142 no feto na’in-34.141, maibé hafoin remata eleisaun prezidensál volta daruak, ekipa tékniku sira hahú kedas atividade Resensiamentu Eleitorál Atualizasaun Baze Dadus (RABD) iha edifísiu STAE munisipál to’o fulan-agostu.
Notísia relevante: STAE Bobonaro husu lideransa komunitária fornese dadus EhD ho loloos
“Ami rejistu hosi janeiru to’o setembru, ohin 29 ne’e, ami hetan hamutuk 6.289. Hosi númeru ne’e mane 3.435, feto iha 2.854, maibé ami seidauk bele hatene totál loloos tanba agora sei iha fulan-setembru nia laran hela, ita sei rejistu to’o fim do ano mak ami bele relata totál eleitór,” nia ko’alia iha Maliana, kinta ne’e.
Mariano haktuir, iha loron 01 fulan-setembru ne’e mak STAE foin koloka operadór sistema inklui asistente ba iha postu administrativu Atabae, Balibo, Cailalco, Bobonaro no Lolotoe atu hakbesik atendimentu ba komunidade sira iha baze.
Enkuantu kona-bá komunidade sira-ne’ebé ho kondisaun defisiénsia ka sira-ne’ebé moras la’ós labele, nune’e iha loron 02 fulan ne’e STAE serbisu Komisaun Nasionál ba Eleisaun (CNE, sigla portugés) no hetan apoia hosi UNDP halo ekontru koordenasaun xefe suku sira atu fasilita dadus ema ho defisiénsia.
“Ita identifika ona, ba sira-ne’ebé kartaun eleitorál laiha ita ba atende direita iha sira-nia fatin, kuandu ita hetan pedidu hosi xefe suku no xefe aldeia, kuandu sira labele mai iha sentru produsaun kartaun eleitorál, ita ba direita de’it,” nia hateten.
Atividade resensiamentu eleitorál ne’e ba sidadaun Timor-Leste ne’ebé atinje ona tinan 16 ba leten no seidauk rejistu, tenke lori dokumentu sira hanesan karatun RDTL orijinál no kópia tahan ida, bele mós Bilklete Identidade (BI) ka Pasaporte Timor-leste orijinál válidu no kópia tahan ida.
Ba sira-ne’ebé atu atualiza dadus hanesan hadi’a naran ka data moris sala,tenke lori dokumentu sira hanesan, sertidaun RDTL, BI ka pasporte válidu orijinál no kópia tahan ida no hatudu mós kartaun eleitorál orijinál.
Ba sira-ne’ebé atu muda hela fatin lori dokumentu sira hanesan,deklarasaun muda hela-fatin hosi xefe suku ne’ebé hela ba, sertidaun RDTL ka BI ou pasaporte válidu orijinál no kópia tahan ida, hatudu mós kartaun eleitorál orijinál.
Enkuantu ba sira-ne’ebé kartaun lakon, lori dokumentu sira hanesan, deklarasaun kartaun lakon hosi Polísia Nasionál Timor-Leste (PNTL), sertidaun RDTL ka BI no pasaporte válidu orijinál no kópia tahan ida.
“Ami husu ba sidadaun sira-ne’ebé seidauk iha kartaun eleitorál atu mai rejista ita-boot sira-nia aan ba atu hetan kartaun eleitorál bainhira idade tinan 17, nune’e iha eleisaun ruma karik itaboot sira bele ezerse ita-boot sira-nia direitu atu ba vota,” Diretór Mariano apela.
Notísia relevante: STAE Bobonaro hahú resensiamentu eleitorál
Jornalista : Sérgio da Cruz
Editór : Evaristo Soares Martins
