DILI, 30 setembru 2022 (TATOLI)—Asosiasaun Kafé Timór (ACT, sigla portugés) halo aprezentasaun kafé íbridu Timor iha eventu Melbourne International Coffe Expo (MICE) 2022 iha Austrália.
ACT haruka ekipa di’ak sira hosi Letefoho Specialty Coffee Roaster, Orijen Timor, Aroma Timor no Timor Heyday Coffee International Trade, Lda no support hosi Market Development Facility no The Asia Foundation in Timor-Leste.
Iha biban ne’e, Embaixadora Timor-Leste iha Austrália, Inês Almeida, hateten, eventu ne’e hahú iha loron 28 novembru no ramata iha 30 setembru, ne’ebé Timor-Leste nia partisipasaun ne’e hanesan orgullu ida tanba bele aprezenta kafé iha palku mundiál.
“Daudaun ne’e, iha plantasaun kafé barak iha mundu iha Amérika Súl, Áfrika no Ázia, maibé plantasaun sira ne’e halo hosi íbridu Timor ne’ebé ho naran oioin hanesan Catimor, Sarchimor, Ruiru 11, Costa Rica 95 no seluk tan. Ida-ne’e hatudu katak kafé íbridu Timor salva kafé sira iha mundu,” Embaixadora dehan liuhosi nota ne’ebé Agência Tatoli asesu, sesta ne’e.
Notísia relevante: CCT sosa kafé tasak tonelada 8.500 tinan ne’e
MICE rekoñese Timor-Leste konsege sai hanesan reputasaun exportasaun ba kafé ne’ebé iha kualidade a’as liu ho íbridu Timor ne’ebé úniku no sai favóritu ba barista no ema ne’ebé hadomi kafé.
“Iha MICE ita sei hetan oportunidade hodi koko kafé sira-nia sabor espesiál inklui kafé Timor nian ne’ebé halo hosi kafekultór sira,” nia akresenta.
Aleinde ne’e, Timor-Leste orgullu ho istória kafé tanba família timor-oan barak mak kuda kafé iha tinan atus ba atus, ai-hun kafé íbridu Timor ne’ebé ema barak uza ona atu halo restokasaun ba to’os sira iha mundu tomak.
Iha MICE tinan ne’e, Governu Austrália nia fasilidade dezenvolvimentu merkadu orgullu tebes hodi apoia Timor-Leste nia estasaun no viajen barista timor-oan na’in-lima.
Eventu anuál ne’e koñesidu iha Ázia no Pasífiku tomak hanesan eventu kafé dedikadu ne’ebé boot ho interesante liu iha rejiaun ne’ebé tuir previzaun sei hetan partisipante 11.000 resin.
Partisipante timor-oan sira sei liga ho na’in ba kafé, estrada, fábrika ekipamentu, fornesedór servisu sira no seluk tan atu fasilita oportunidade negósiu reál sira.
Jornalista : Arminda Fonseca
Editora : Julia Chatarina
