EKONOMIA, HEADLINE

CCT sosa kafé tasak tonelada 8.500 tinan ne’e

CCT sosa kafé tasak tonelada 8.500 tinan ne’e

Plantasaun Kafé iha Munsípiu Ainaro, domingu (15/05). Imajen Tatoli/Francisco Sony

DILI, 22 setembru 2022 (TATOLI)—Prezidente Kooperativa Kafé Timor (CCT,sigla portugés), Mário Soares, hateten, sira sosa ona kafé tasak tonelada 8.500 tinan ne’e.

“CCT sosa kafé tasak hamutuk tonelada 8.500 tinan ne’e no ita prosesa maran atu halo exportasaun kontentór 72. Fulan hirak ba kotuk ita konsege exporta ona kontentór 85, kada kontentór ida iha tonelada 18,” Prezidente CCT informa ba Agência Tatoli, iha ninia knaar fatin, Bidau Lecidere, kinta ne’e.

Notísia relevante: Xina apoiu fundu $70.000 ba ACT hodi hasa’e produsaun kafé

Kafé ne’ebé sosa, kada tinan halo exportasaun bá Amérika, Nova Zelándia no Austrália, uluk bá Kánada hotu maibé sertifikadu hosi Europa nian mate entaun la exporta ona.

“Ita haruka kafé kada tinan bá Amérika no sira husu tan tonelada 30 iha fulan-marsu ne’e, maibé tanba sertifikadu exportasaun mate, entaun daudaun ita sei prosesu hela, nune’e kuandu ramata ita kontinua haruka kafé,” nia tenik.

Nia dehan, nasaun sira husu kafé ho kuantidade boot, maibé kafé mak la to’o, tanba haree produsaun kafé iha rai-laran menus no kestaun balun tanba mudansa klimátika.

“Tinan kotuk ita sosa kafé tasak besik tonelada 21,” nia haktuir.

CCT aleinde sosa kafé, sosa mós produtu seluk hodi halo exportasaun hanesan baunilla, cengkeh, no kakau.

“Ita sosa baunilla matak hamutuk tonelada 20 resin tinan ne’e hodi halo maran no bele exporta tonelada tolu resin bá Indonézia, exporta cengkeh kontentór ida bá Indonézia kada tinan no exporta kakau bá austrália maibé seidauk barak, ho kuantidade kilograma 300,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!