VIQUEQUE, 29 setembru 2022 (TATOLI)–Administradór munisípiu Viqueque, Januário Soares ‘Bolly’, halo ona koordenasaun ho Ministériu Obra Públika (MOP) atu hadi’a dalan Lugatoi, iha suku Caraubalo, postu administrativu Viqueque, ne’ebé besik kotu.
“Daudaun ne’e ha’u iha Dili, rona dehan dalan parte Lugatoi nian kotu, nune’e hodi kalan ha’u halo ona kordenasaun ho parte MOP. Iha semana oin sei halo normalizasaun dalan Lugatoi,” Administradór hateten ba Agência Tatoli, via telefónika, sesta ne’e.
Autoridade ne’e dehan, aban ekipa hosi MOP sei ba halo survey iha dalan Lugatoi no sei halo normalizasaun.
“Ida-ne’e ha’u esforu no ha’u mós simu fali resposta hosi parte MOP katak emprza xinés ne’ebé hadi’a dalan parte Ossu nian maka sei tun ba halo normalizasaun dalan Lugatoi nian,” nia akresenta.
Notísia relevante: Utilizadór dalan husu parte relevante halo intervensaun dalan kotu Lugatoi
Nune’e, parte MOP sei koordena ho empreza ne’ebé toma-konta hadi’a dalan tanba empreza xinés ne’e rasik uza karreta fuzu hodi estraga dalan ne’e.
Antes ne’e, akontese erozaun rai halai maizumenus tuku 14:00, iha kuarta (29/09), hodi rezulta dalan kotu iha Lugatoi no difikulta movimentu transporte públiku.
Jornalista : Vitorino Lopes da Costa
Editora : Julia Chatarina
