iklan

HEADLINE, MUNISÍPIU, VIQUEQUE

MTKI sosializa dekretu-lei jogu tradisionál ba autoridade Viqueque

MTKI sosializa dekretu-lei jogu tradisionál ba autoridade Viqueque

Meza Bola Guling. Imajen/Espesiál

VIQUEQUE, 30 setembru 2022 (TATOLI)—Inspesaun Jerál Jogu hosi Ministériu Turizmu Komérsiu no Indústria (MTKI), sesta ne’e, halo sosializasaun dekretu-lei númeru 6/2016 20 abril kona-ba inisia rejime jurídiku lisensiamentu, esplorasaun no kontrolu atividade jogu sosiál no diversaun, mákina jogu no jogu tradisionál iha Timor-Leste, ba autoridade munisípiu Viqueque.

Tuir Inspetór Jogu, Domingos da Costa Guterres, inisiativa ne’e ho objetivu atu fó sai matadalan dekretu-lei ba autoridade lokál, seguransa no komunidade hodi sira bele kumpreende prosesu legál sira.

“Atividade jogu sufisiente no fiskalizasaun di’ak, sei sai fonte rendimentu forte ba Estadu no bele mós sai nu’udar fatór atu hamosu dezenvolvimentu iha zona interese iha área turístiku. Tanba ne’e mak ami mai halo sosializasaun atu etu entidade relevante sira bele kompreende regra sira,” Inspetór Jogu informa iha salaun administrasaun munisipál, sesta ne’e.

Notísia relevante: Autoridade Viqueque halo abertura jogu tradisionál hetan lisensa hosi MTKI

Iha munisípiu Viqueque, jogu bola guling foin ida maka hetan rejistu no hetan lisensa hosi Inspesaun Jerál.

“Ami nafatin husu kumpre regra hosi dekretu-lei. Kompañia hetan linsensa fulan-ida, hafoin ami sei haree ninia progresu serbisu no sei halo avalisaun hafoin halo kontinuasaun, maibé tenke hatudu vontade di’ak no koopera ho autoridade no seguransa hodi halo avalisaun,” nia akresenta.

Kompañia iha munisípiu Viqueque Osnara-Digma, unip LDA hetan lisensa iha fulan-agostu, ne’ebé hahú atividade jogu iha loron 21 setembru 2022.

Atu hetan lisensa atividade jogu hanesan bola guling la’ós hanesan negósiu baibain ne’ebé ema hotu fasil hetan, maibé tenke liuhosi prosesu ida hafoin bele hetan lisensa hosi Governu.

“Kritériu mak tenke kumpre regra hosi dekretu-lei no autorizasaun hosi autoridade munisípiu, molok hetan lisensa hosi Inspeksaun Jerál. Ami apela ba abitante sira ne’ebé sei kontinua loke jogu bola guling ilegál, di’ak liu hapara atividade sira ne’e tanba bainhira ami hetan mak sei fó prosesu todan no prega infrasaun boot,” nia fó hanoin.

Iha fatin hanesan, Komadante PNTL munisípiu Viqueque, Superentendente, Sebastião Alves Quintão, haktuir, Polísia Nasionál Timor-Leste (PNTL) munisípiu Viqueque hola parte iha atividade sensibilizaun tanba durante ne’e sempre akompaña jogu ilegál.

“Antes ne’e ha’u halo ona intervensaun ba komunidade ne’ebé loke jogu bola guling ilegál sira iha munisípiu Viqueque,” nia hato’o.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!