DILI, 30 setembru 2022 (TATOLI)–Portu Tibar hahú ona atividade operasionál dahuluk hanaran ‘go Life’, sesta ne’e, ne’ebé simu ona ró rua.
“Ami hetan ona aprovasaun hosi Governu katak autoriza hahú ‘go life’, ka hahú halo operasaun iha Portu Tibar, ne’ebé ami prepara ona ekipa, ró mós tama daudaun ona, ne’ebé ami hahú ona atividade operasaun. Ohin rua mak tama, ida tama iha parte dadeer ne’e hosi Singapura no parte lorokraik ida tama tan hosi Surabaya,” Diretór Timor Port, Rafael Ribeiro, hateten iha ninia knaar fatin, Portu Tibar.
Ró rua ne’ebé tama tula kontentór iha loron 03 no 04 outubru no ró sei tama tan tula foos.
“Sistema ne’ebé uza halo verifikasaun ka rejista sasán tama ne’e uza nafatin sistema hosi Alfándega hanesan ASYCUDA World, ne’ebé antes ne’e uza iha Portu Dili,” nia akresenta.
Notísia relevante: Portu Tibar bele akumula kontentór to’o 12.000
Timor Port rekruta traballadór foun serbisu iha Portu Tibar maibé balun hanesan traballadór ne’ebé antes ne’e iha ona.
“Ami halo rekrutamentu ba ema 200, maibé agora iha 100 resin, ne’e sufisiente ona halo operasaun, seluk hein kompleta de’it, empreza ne’ebé daudaun serbisu iha Portu Tibar nia laran ne’e hosi Timor Port de’it, ne’e bazeia ba akordu ne’ebé halo ona ho Governu,” Diretór haktuir.
Portu Tibar opera durante oras 24 kada loron, maibé serbisu administrasaun bazeia ba oras serbisu nian, maibé sei komunika ho autoridade relevante nune’e aban-bainrua bele koopera hodi aumenta oras serbisu nune’e bele serví kliente sira di’ak liután.
“Ami iha ona regulamentu ba traballadór ne’ebé serbisu liu oras, ne’ebé ami serbisu no halo tuir regulamentu,” nia tenik.
Oráriu ba atrasaun ró iha Portu Tibar laiha limitasaun, bazeia de’it ba oráriu hosi na’in ba ró sira.
“Sira informa mai ami katak sira-nia ró tama oras hanesan ne’e, ami halo preparasaun tanba fasilidade kompletu, ne’ebé hatama ró no hasai bainhira de’it, laiha limitasaun ba ró ne’ebé mak tama no dala-ruma haree ba movimentasaun ró, bele hatama ró rua dala-ida,” nia esplika.
Bainhira kontentór sira hatún ona sasán, karreta tula sasán atu tama foti sasán tenke iha kartaun asesu (access pass).
“Ami garante sei laiha macet iha portu laran, maibé atu kleur ka lais ne’e depende ba autoridade nia prosesu, maibé iha ne’e ami implementa sistema foun mak access pass, no sistema tenke rekoñese ninia access pass ne’ebé hatudu nia atu foti kontentór iha ne’ebé, la tama arbiru ona hanesan iha Portu Dili nian antes,” nia salienta.
Governu sei halo inaugurasaun ofisiál Portu Tibar iha loron 30 novembru 2022.
Jornalista : Antónia Gusmão
Editora : Julia Chatarina
