DILI, 30 setembru 2022 (TATOLI)-Prezidente Repúblika (PR), José Ramos Horta, hateten Timor-Leste (TL) nia relasaun bilaterál ho Xina importante hanesan rai ida poténsia globál.
“Ita nia relasaun ho Xina importante tebes, tanba rai ida poténsia globál no poténsia iha Aziátika. Ita bele hateten ita-nia viziñu, ne’e-duni ita buka relasaun di’ak hanesan rai hotu-hotu besik ka do’ok maibé ho rai sira ne’ebé besik tenke hametin liután relasaun”, Xefe Estadu ba jornalista bainhira partisipa iha ámbitu resepsaun hodi selebra aniversáriu fundasaun Repúblika Populár Xina ba dala-73 iha El-Legendáriu, sesta ne’e.
Ramos Horta hatutan loron importante tebes iha sira-nia proklamasaun nu’udar Repúblika Populár Xina. “Tantu relasaun di’ak, tanba ne’e ohin ha’u mai ho membru Governu hatudu solidariedade no amizade hodi selebra”.
Hahú kedas iha tempu Timor-Leste nia restaurasaun indepedénsia 2002, nia dehan Xina apoiu oioin liuhosi relasaun bilaterál maibé liuhosi sistema Organizasaun Nasoins Unidas nian, hanesan haruka polísia hola parte forsa pás.
“Apoiu seluk iha setór infraestrutura, edifísiu públiku, agrikultura no iha tinan sira nia laran ne’e komérsiu Xina aumenta iha ita-nia ekonómia, tanba mateira konstrusaun sai baratu liu, timoroan bele asesu besi, simente fasil liu duke uluk”, Horta hatutan.
Sorin seluk, Embaixadór Xina iha Timor-Leste, Xiao Jianguo, hateten Xina sempre bemvindu ho nasaun hotu iha mundu inklui Timor-Leste hodi servisu hamutu, lori prospriedade ba povu hodi atinje inisiativu dezenvolvimentu globál no inisiativu seguransa globál.
Estabelesimentu relasaun bilaterál ka diplomátika Xina ho Timor-Leste durante tinan 20 hatudu relasaun di’ak tebes. Xiao Jianguo hatutan, Xina fó ona asisténsia no apoiu dezenvolvimentu Timor-Leste iha área oioin. “Xina sempre firme ho Timor-Leste iha tempu difísil no urjente. Partikularmente durante iha Covid-19 Xina hanesan nasaun dahuluk oferese kuantidade vasina no ekipamentu médiku, no mós iha katástrofe kalamidade liu ba oferese apoiu umanitáriu”, katak nia.
Embaixadór ne’e fiar katak futuru kooperasaun Xina ho Timor-Leste sei haklean liután iha senáriu fantástiku ka furak tebes.
Jornalista : Nelson de Sousa
Editora : Rita Almeida
