DILI, 30 setembru 2022 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), sesta ne’e, realiza Pre Departure Briefing (PDB) ba kandidatu traballadór na’in-66 ne’ebé sei serbisu iha Austrália iha fulan-outubru nia-laran.
“Objetivu programa ne’e bazeia ba kritéria ne’ebé empregadór hosi Australia fó, tanba ne’e ha’u husu ba kandidatu sira ne’ebé hetan oportunidade atu aproveita ho didi’ak hodi apreende, tanba faze ida-ne’e sei lori ita hatene kultura, lei, no disiplina serbisu iha Austrália,” Diretór Nasionál Empregu Exteriór, Filomeno Soares, hateten, iha salaun Sentru Formasaun ETDA, Aimutin.
Notísia relevante: Traballadór timor-oan serbisu iha Koreia no Austrália kontribui reseita millaun $78
Nia dehan, daudaun ne’e problema boot iha Austrália maka traballadór sira halai ses hosi sistema, tanba ne’e husu ba traballadór foun sira ne’ebé foin hetan oportunidade bá serbisu labele halo tuir, tanba bainhira halai ses hosi sistema maka sei taka dalan ba empregadór atu emprega tan joven timor-oan sira ne’ebé hein oportunidade serbisu.
“Bainhra bá serbisu iha Austrália, imi reprezenta nasaun no povu Timor-Leste, no husik hela família tanba atu hadi’a moris, nune’e husu atu halo tuir kompromisu ne’ebé ita boot sira halo. Tanba ne’e tenke serbisu kumpre lei ne’ebé ema-nia nasaun implementa nune’e serbisu rai osan hodi fila mai bele hadi’a ekonomia família no nasaun,” Diretór fó hanoin.
Traballadór timor-oan na’in-66 kompostu hosi mane 40 no feto 28, ne’ebé sei bá serbisu iha empreza MC Cristal na’in-10, empreza Connect Oliveira Flower ema na’in-neen no Tasmania Berries na’in-50.
Jornalista : Arminda Fonseca
Editora : Julia Chatarina
