VIQUEQUE, 03 outubru 2022 (TATOLI)–Administradór postu Viqueque vila, Brandão Soares Duarte, informa, empreza internasionál xinéz, CRIG-COVEC hahú normaliza ona dalan Lugatoi, iha suku Caraubalo, postu administrativu Viqueque, munisípiu Viqueque, ne’ebé kotu iha semana kotuk.
“Bainhira dalan ne’e kotu, ha’u telefone kadas ba Ministériu Obra Públika (MOP) hodi ekipa planeamentu mai haree kedan iha sábadu semana kotuk. Aleinde ne’e, ha’u halo mós karta ba empreza xinéz hodi normaliza,” Administradór hateten ba Agência Tatoli, iha Lugatoi, segunda ne’e.
Notísia relevante: Autoridade Viqueque koordena ona MOP rezolve dalan kotu Lugatoi
Autoridade lokál ne’e rekoñese, bainhira dalan ne’e kotu difikulta tebes movimentu transporte tanba laiha dala alternativa ruma atu liu.
“Dalan úniku maka ida-ne’e de’it, bainhira la normaliza, ema halo movimentu bá mai ladi’ak. Atu ba Uatucarbau, Uatulari no Lacluta mós ladi’ak. Entaun ha’u husu empreza xinéz ne’e mai normaliza provizóriu hodi movimentu la’o normál filafali,” nia akresenta.
Dalan ne’e uluk iha tinan 2005 empreza BTK maka mai hada fatuk hosi mota mak sa’e, maibé la kleur fatuk ne’ebé hada sa’e mout hotu.
“Iha foho leten, iha bee-matan ida ne’ebá, nune’e sulin tun mai hodi estraga dalan ne’e. Daudaun rai monu tan, ita-nia empreza sira aterru ida-ne’e provizóriu hodi movimentasaun transporte sira bele la’o normál filafali,” nia tenik.
Aleinde ne’e, Autoridade ne’e fó hanoin ba MOP tenke akompaña bainhira atu halo metin dalan no presiza kee maka tau barreira hodi satán rai monu.
“Diresaun Nasionál iha MOP tenke akompaña didi’ak bainhira atu halo metin rai ne’e tanba rai monu beibeik ona. Bainhira atu halo rai labele halai presiza kee iha besik mota hodi hetan rai to’os maka tau bronjon. Bainhira ita aterru de’it hanesan ne’e maka tempu udan boot monu filafali,” nia esplika.
Tuir observasaun Agência Tatoli iha terrenu, nota katak empreza responsável daudaun ne’e aterru dalan ho rai mutin nune’e transporte sira bele halo movimentu ho normál.
Jornalista : Vitorino Lopes da Costa
Editora : Julia Chatarina
