iklan

DILI, HEADLINE, POLÍTIKA

Governu submete ona proposta lei OJE 2023 ba PN

Governu submete ona proposta lei OJE 2023 ba PN

Edifísiu Palasiu Governu. Imajen Tatoli/Francisco Sony

DILI, 03 outubru 2022 (TATOLI)-Governu liuhosi Ministéiru Finansa (MF), segunda ne’e aprezenta ona proposta lei Orsamentu Jerál Estadu (OJE) 2023 ho montante $3.155.715.306 ba Parlamentu Nasionál (PN).

Notísia relevante: Governu aprova PPL OJE 2023 no halo alterasaun taxa impostu seletivu

Proposta lei OJE ne’e aprezenta hosi Ministru Finansa, Rui Agosto Gomes, akompaña hosi Vise Ministru MF, António Freitas  no Ministru Asuntu Parlamentár no Komunikasaun Sosiál (MAPKOMS), Francisco Jerónimo.

Biban ne’e, Prezidente PN, Aniceto Longuinhos Guterres Lopes, hateten Governu kumpre ona nia obrigasaun tuir lei Enkuadramentu Orsamentu nian hodi aprezenta proposta lei OJE ne’e. “01 outubru Governu aprezenta ona proposta lei OJE mai parlamentu, maibé monu iha  loron sábadu la’ós dias úteis, nune’e  tuir regra jerál kuandu prazu monu iha hahú iha dia útil tuir mai mak ohin segunda-feira, portantu Governu kumpre ona ninia obrigasaun tuir lei haruka submete orsamentu tuir prazu’’, Prezidente Parlamentu hato’o liuhosi konferénsia imprensa ba jornalista iha sala konferénsia PN hafoin simu proposta lei OJE 2023.

Aniceto Guterres, hatutan iha lei define mós loron 45 hafoin submisaun proposta lei OJE hosi Governu mai iha PN. “Loron ne’ebé PN simu, komesa dentru loron 45 PN tenke iha ona desizaun aprova ou rejeita, ohin simu ona submisaun proposta lei OJE 2023 ninian nia prosesu sei la’o tuir tramitasaun rejimentál ba komisaun C trata asuntu Finansa Públiku no komisaun espesializada atu apresiasaun no relatóriu paresér”.

Iha ona kalendáriu globál PN nian, nia dehan, reuniaun plenária tersa aban (04/10/2022)  meza PN sei baixa ba komisaun C, audénsia públika no debate iha plenária PN, diskusaun no aprovasaun tantu jeneralidade, espesialidade sei hahú iha 07 novembru  2022, no 18 novembru aprova finál globál no iha 22 novembru envia ba Prezidente Repúblika hodi halo promulgasaun tuir kompeténsia ne’ebé iha, nune’e PN halo esforsu tomak hodi kumpre prazu previstu.

Ministru Finansa (MF), Rui Agosto Gomes, hateten dokumentasaun orsamentál ne’ebé Governu aprezenta ba PN mak hanesan relatóriu orsamentál, dezenvolvimentu orsamentál, elementu informativu ho anexu lubun ida kona-ba fundu mina rai, fundu kapitál dezenvolvimentu umanu, fundu infraestrutura, dezenvolvimentu munisípiu sira, orsamentu ba sidadaun, orsamentu kontribuisaun parseiru, informasaun Grande Opsaun Planu no mós markadór sira, informasaun seguransa sosiál, RAEOA.

Nia dehan, proposta hosi Governu bazea Lei Grande Opsaun Planu (GOP) tetu ne’ebé deside tiha ona billaun $3.155.715.306.

Enkuantu, despeza globál nian $3.156.922.141 no despeza Setór Públiku Administrativu $3.155.715.306, inklui Fundu Kombatente Libertasaun Nasionál no orsamentu Seguransa Sosiál no Rejiaun Administrativa Espesiál Óe-Cusse Ambeno (RAEOA).

Enkuantu, despeza ba serbisu no entidade Administrasaun Sentrál ho valór biliaun $2,8. Despeza sira ne’ebé prevee ba Seguransa Sosiál ho valór millaun $235,7 no RAEOA ho montante millaun $120.

Sei la inklui orsamentu ne’ebé prevee ba Fundu Kombatente Libertasaun Nasionál, alokasaun ba kuadru instituisionál 33%, kapitál sosiál 35%, dezenvolvimentu infraestrutura 18%, dezenvolvimentu ekonómiku no fundu kontinjénsia 3%.

Orsamentu ne’e sei  uza hodi finansia programa 45 liuhosi atividade prinsipál 275, organizadu  iha área estratéjiku  16 ne’ebé Governu sei foku ba iha tinan oin hanesan agrikultura, pekuária, peska no floresta, ekonómia no empregu, turizmu, dezenvolvimentu rurál no abitasaun, ambiente, petróliu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasona internasionál no polítika esterna.

Tuir portál transparánsia hosi Ministéiru Finansa  to’o iha loron segunda ne’e (03/10/2022) fó sai katak OJE 2022 ho nia orijen $3,211,476,697.06, kompromisu sira $256,067,312.60, obrigasaun sira $127,794,443.91, atuál $1,082,181,159.91, saldu $1,745,433,780.64 no ezekusaun 37.7%

Notísia relevante: Governu aprova programa integra iha proposta OJE 2023

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!