iklan

DILI, POLÍTIKA

PN ratifika akordu kompaktu MCC

PN ratifika akordu kompaktu MCC

Atividade Parlamentu Nasionál iha aprovasaun. Imajen dokumentasaun Tatoli

DILI, 03 outubru 2022 (TATOLI)-Parlamentu Nasionál (PN), segunda ne’e liuhosi reuniaun plenária ratifika ona akordu kompaktu Millennium Challenge Coorporation (MCC).

Notísia relevante: Timor-Leste sei selebra akordu ho MCC implementa programa redús kiak

“Rezultadu votasaun a-favór 40, kontra 0 no abstensaun 10, ho ida ne’e proposta rezolusaun Parlamentu Nasionál númeru 23/V (4a) -ratifika akordu kompaktu Millennium Challenge aprovadu”, Prezidente PN, Aniceto Longuinhos Guterres Lopes, anúnsiu liuhosi reuniaun plenária.

Ministru  Ministru Prezidénsia Konsellu Ministru (PCM, sigla portuges), Fidelis Manuel Leite Magalhães, apresia ratifikasaun PN nian ba akordu ne’ebé Governu lori mai. “Dahuluk ami hakarak atu espresa apresiasaun ba komisaun B (trata asuntu Negósiu Estranjeiru, Defeza no Seguransa) salvaguarda interese aas liu ne’ebé durante semana kotuk konvoka Governu mai esplika detallu no diskusaun klean hodi fó imformasaun”.

Antes ne’e, Governu liuhosi reuniaun Konsellu Ministru (KM),  aprova projetu ba proposta rezolusaun PN ba ratifikasaun akordu kompaktu Millennium Challenge Corporation (MCC).

Proposta ne’e aprezenta hosi Ministru PCM, Fidelis Manuel Leite Magalhães. “Pakote kooperasaun ne’e asina ona iha loron 19 jullu liubá no sei ezekuta durante tinan-lima no iha montante globál millaun $484. Tanba asina ona no lori mai Konsellu Ministru aprova ona, nune’e sei haruka liu ba Parlamentu Nasionál atubele halo ratifikasaun” Portavós Governu, Fidelis Manuel Leite Magalhães, hateten hafoin reuniaun ezekutivu, iha Palásiu Governu.

Programa ne’e sei haree ba komponente prinsipál rua hanesan hadi’a sistema bee, saneamentu no drenajen no ida seluk iha área edukasaun no formasaun nian, ho objetivu hamenus kontaminasaun ba bee-moos no bee iha rai-okos ne’ebé bele fó moras, impede moris di’ak no saúde ba labarik no adultu sira.

Aleinde ne’e, projetu ne’e inklui konstrusaun ba fábrika ida hodi halo produsaun dezinfetante kímiku ba abastesimentu bee iha sidade, konstrusaun ba sistema sentrál dahuluk bee reziduál nian iha país, hadi’a rede drenajen ba kapitál Dili no munisípiu viziñu haat, reforma polítika no institusionál sira nune’e mós mudansa sosiál no komportamentu hodi hadi’a sistema saneamentu báziku no jestaun bee iha nível doméstiku.

Ida seluk, objetivu hadi’a kualidade ensinu sekundáriu ba alunu sira, liuhosi hadi’a ensinu sekundáriu no lideransa eskolár sira. “Projetu ne’e sei estabelese instituisaun formál sertifikasaun formasaun nian dahuluk ba formasaun profesór sira iha nasaun ne’e, sei hanaran ‘Sentru Exelénsia’, ne’ebé sei fó formasaun no sertifikasaun profisionál ba profesór no líder ensinu sekundáriu iha tempu ohin loron no aban bainrua”, Governante ne’e subliña.

Investe iha formasaun ba profesór sira, sei prodús eskola sekundária sira ne’ebé di’ak liu, ho alunu sira  ne’ebé bem preparadu ba merkadu serbisu ka ba edukasaun pós sekundária, nune’e aumenta ninia kapasidade hodi kontribui ba kresimentu ekonómiku Nasaun nian.

Jornalista       : Nelson de Sousa

Editora           : Rita Almeida

iklan
iklan

Leave a Reply

iklan
error: Content is protected !!