DILI, 03 outubru 2022 (TATOLI) – Vise Ministra Solidariedade Sosiál no Inkluzaun (MSSI), Signi Verdia, hateten ema ne’ebé sai benefisiáriu ba subsídiu $200 laharee ba situasaun estatutu uma-kain nian maibé haree ba kondisaun ekonomia tanba impaktu hosi Covid-19.
“Ita iha subsídiu $200 ba tinan ikus nian atu fó ba uma-kain ne’ebé rejistu iha livru uma-kain iha suku nian to’o loron 28 fevereiru 2022 ne’e. Kuandu família ida mak iha livru uma-kain iha suku, atu nia situasaun estatutu hanesan ne’ebé maibé nia nafatin iha direitu ba subsídiu ne’e, maibé ida-ne’e fila-fali ba ema ida-idak nia konsiénsia”, Signi Verdial, hateten ba Ajénsia Tatoli, iha nia knaar fatin Caicoli, segunda ne’e.
Vise MSSI hateten KM altera ona dekretu lei númeru 37/2022, artigu 2 no iha ne’ebá esplika katak uma-kain ne’ebé rejistu iha livru uma-kain suku nian iha direitu hetan subsídiu ne’e.
“Iha ne’ebá ita hadia tiha ona liafuan vunerável no ita tau fali subsídiu ba uma-kain hotu-hotu, entaun atu se de’it mak rejistu ona iha livru uma-kain suku nian iha direitu hotu”, nia dehan.
Governante ne’e hatutan Governu nia desizaun ne’e bazea situasaun Timor-Leste iha resesu ekonómia ida-ne’ebé difísil tebes. Hahú hosi pandemia Covid-19 to’o sitausaun inflasaun entaun nia impaktu ba uma-kain hotu-hotu.
“La’ós ba ita-nia maluk vunerável sira de’it entaun inflasaun ida-ne’e ita-boot sira akompaña, Primeiru Ministru Taur Matan Ruak, sempre hateten katak Governu iha prioridade importante tolu, mak primeiru ita investe ba ema, segundu ba ema no terseiru mós ba ema”, Verdial hateten.
Iha sitausaun hanesan inflasaun ne’e, nia dehan Governu iha hanoin atu halo protesaun ba ninia sidadaun, mak uma-kain hotu-hotu iha direitu ne’ebé hanesan hodi simu subsídiu ne’e.
Dadus ne’ebé Ministériu Adminitrasaun Estatál (MAE) submete mai MSSI purvolta 339.000, uluk dadus uma-kain hamutuk 330.000.
Jornalista: Osória Marques
Editór : Zezito Silva
