DILI, 04 setembru 2022 (TATOLI)–Eskola Ensinu Sekundáriu Jerál (ESJ) 05 maiu Becora menus espasu sala aula, tanba ne’e estudante finalista 390 sei transfere ba Eskola Ensinu Sekundáriu Tékniku Vokasionál (TEKVOK) ekonomia komérsiu Becora hodi tuir ezame nasionál.
“Totál estudante finalista tinan ne’e hamutuk 781. Dirijente sira iha Eskola TEKVOK ne’ebá aseita hodi fó fatin ba ita atu koloka estudante sira iha tempu ezame nasionál no ezame lokál tanba sira iha fasilidade karteira eskolár sufisiente no sala aula lubuk ida maka la utiliza. Tanba ne’e ami la presiza droop fasilidade hosi ami-nia eskola ba ne’ebá,” Diretór Eskola ESJ 05 maiu Becora, Adelino Nicolau Ornai, hateten ba Agência Tatoli, iha Eskola ESJ 05 maiu Becora, tersa ne’e.
Notísia relevante: Estudante 17.195 iha Dili prepara tuir ezame nasionál
Tuir responsável eskola ne’e, estudante 390 ne’ebé sei hetan espasu iha Eskola TEKVOK hosi grupu Siénsia Sosiál Teknolojia, maibé grupu Siénsia Sosiál Umana hamutuk 391 mantein nafatin Eskola ESJ 05 maiu.
Eskola públika ne’e kontinua enfrenta problema falta sala aula tanba númeru estudante kontinua aumenta, daudaun iha estudante 2.050.
“Ami iha sala aula 14, tanba ne’e sira tenke fahe ba turma tolu atubele fó espasu ba estudante sira bele simu matéria ho di’ak,” nia akresenta.
Jornalista : Tomé Amado
Editora : Julia Chatarina
