DILI, 04 outubru 2022 (TATOLI)–Prosesu konstrusaun edifísiu foun andár ida iha Eskola Ensinu Sekundáriu Jerál (ESJ) 05 maiu Becora ho kustu $355.629,46 maibé konsege paradu durante fulan-rua.
Diretór Eskola ESJ 05 maiu Becora, Adelino Nicolau Ornai, hateten, konstrusaun edifísiu andár foun kompostu hosi sala aula ualu, haat iha kraik no haat iha leten no toma-konta hosi empreza Maluk Unipesoal, Lda ho númeru konstrusaun NCB-R 007/DNA-2021.
“Konstrusaun ne’e paradu tanba ami rona empreza la kumpre rekizitu. Tanba ne’e Governu liuhosi Diresaun Nasionál Dezenvolvimentu Parque Eskolár (DNDPE) no Ajénsia Dezenvolvimentu Nasionál (ADN) maka trava prosesu konstrusaun,” Diretór informa ba Agência Tatoli, iha resintu eskola, tersa ne’e.
Notísia relevante: Eskola 16 no sala aula 64 iha Dili sei hadi’a tinan ne’e
Maski nune’e, konstrusaun sei kontinua filafali semana ne’e tanba hetan ona autorizasaun hosi Governu, enkuantu konstrusaun ne’e rasik foin to’o harii ninia aliserse.
“Edifísiu andár foun ho sala aula ualu ne’e la tama iha projetu komunitáriu, maibé tama iha konkursu públiku, ne’ebé ministériu prevee iha Orsamentu Jerál Estadu,” nia akresenta.
Estudante iha eskola publika ne’e hamutuk 2.050, ne’ebé tuir planu sei fahe turma, iha parte dadeer hahú hosi tuku 08:00-11:30, sai tiha tama fali turma segundu hahú hosi tuku 11:30-14:30 hafoin kontinua fali ho turma terseiru hahú hosi 14:40-17:50.
Ministériu Edukasaun Juventude no Desportu (MEJD) liuhosi ninia planu no programa ba tinan ne’e hakarak hadi’a no harii eskola foun 203 iha territóriu nasionál, atu nune’e bele apoiu estudante sira bele hetan prosesu ensinu aprendizajen adekuadu.
“Ho prosesu sira ne’e hotu kuaze eskola sira ne’ebé tama iha planu konstrusaun no reabilitasaun ne’e hahú ona prosesu sira atubele kumpre durasaun tempu ne’ebé maka Governu liuhosi ministériu rasik kontrata ona ho empreza inklui grupu komunitáriu sira atubele hahú prosesu sira,” nia tenik.
Jornalista : Tomé Amado
Editora : Julia Chatarina
