VIQUEQUE, 04 outubru 2022 (TATOLI)–Diretór Servisu Saúde Munisípiu Viqueque, Francisco de Carvalho, informa, progresu konstrusaun postu saúde iha suku Uaimori, postu administrativu Viqueque Vila daudaun ne’e atinje ona 75%.
“Daudaun ne’e traballadór sira kontinua halo serbisu hodi kompleta serbisu sira-ne’ebé seidauk hotu. Konstrusaun fíziku daudaun ne’e hein tau keramik no odamata inklui fasilidade sira seluk hodi kompleta 100%,” Diretór hateten iha postu saúde Uaimori, tersa ne’e.
Orsamentu ba konstrusaun infraestrutura mai hosi komunidade Japaun hodi fasilita komunidade lokál, enkuantu dezeñu sei tuir padraun hosi Ministériu Saúde (MS) ho totál kustu projetu $90.000.
“Uluk postu saúde Uaimori laiha, nune’e atuál Prezidente Repúblika José Ramos Horta hamutuk ho forsa Austrália mai harii postu saúde provizóriu ida iha Uaimori iha tinan 10 liubá, maibé haree ba kondisaun uma malahuk hotu, entaun ita koordena fali Programa Nasionál Dezenvolvimentu Suku (PNDS) iha tinan 2016 hodi harii tan maka daudaun sei uza hodi fó atendimentu ba komunidade. Foin lalais ha’u halo proposta ba Embaixada Japaun maka daudaun sei halo hela kontrusaun,” nia haktuir.
Notísia relevante: Stock ai-moruk menus iha postu saúde Matahoi
Tuir nia, loloos kontrusaun realiza iha tinan 2020 maibé tanba ho kondisaun COVID-19 maka foin lalais iha tinan 2022 maka hahú konstrusaun postu saúde Uaimori.
Dadaun ne’e, profisionál saúde ne’ebé destaka ona iha suku Uaimori kompostu hosi médiku ida, enfermeiru ida, parteira ida inklui voluntáriu sira hosi saúde públika.
Bazeia ba dadus sensu populasaun tinan 2015, suku Uaimori kompostu hosi aldeia neen hanesan Uma Liurai, Uma Bo’o, Uaibubu, Lu-Lei, Uatu-Lesu no Mea-Uain, ho totál populasaun 1.142, feto 564 no mane 578, hosi totál uma-kain 242.
Jornalista : Vitorino Lopes da Costa
Editora : Julia Chatarina
