DILI, 04 outubru 2022 (TATOLI)-Meza Parlamentu Nasionál (PN) liuhosi reuniaun plenária, tersa ne’e anúnsiu admisaun no baixa proposta lei númeru 46/V(5a)-Orsamentu Jerál Estadu (OJE) 2023 ba komisaun C ne’ebé trata asuntu Finansa Públika ho espesializada permanente hodi fó apresiasaun.
“Komisaun Finansa Públika fó apresiasaun inisiál, relatóriu no pareser, prazu loron 20 tuir rejimentu no komisaun espesializada permanente hodi fó paresrr setoriál, prazu loron 15’’, Prezidente PN, Aniceto Longuinhos Guterres, fó sai iha sala plenária.
Proposta lei OJE 2023, Governu liuhosi Ministru Finansa (MF), Rui Augusto Gomes, akompaña hosi Vise Ministru MF, António Freitas no Ministru Asuntu Parlamentár no Komunikasaun Sosiál (MAPKOMS), Francisco Jerónimo, iha 03 outubru ne’e, submete ona ba PN ho montante $3.155.715.306, ne’ebé simu direta hosi Prezidente PN, Aniceto Longuinhos Guterres Lopes.
Ministru Rui Gomes, dehan proposta hosi Governu bazea Lei Grande Opsaun Planu (GOP) tetu ne’ebé deside ona billaun $3.155.715.306.
Enkuantu, despeza globál nian $3.156.922.141 no despeza Setór Públiku Administrativu $3.155.715.306, inklui Fundu Kombatente Libertasaun Nasionál no orsamentu Seguransa Sosiál no Rejiaun Administrativa Espesiál Óe-Cusse Ambeno (RAEOA).
Enkuantu, despeza ba serbisu no entidade Administrasaun Sentrál ho valór biliaun $2,8. Despeza sira ne’ebé prevee ba Seguransa Sosiál ho valór millaun $235,7 no RAEOA ho montante millaun $120.
Sei la inklui orsamentu ne’ebé prevee ba Fundu Kombatente Libertasaun Nasionál, alokasaun ba kuadru instituisionál 33%, kapitál sosiál 35%, dezenvolvimentu infraestrutura 18%, dezenvolvimentu ekonómiku no fundu kontinjénsia 3%.
Orsamentu ne’e sei uza hodi finansia programa 45 liuhosi atividade prinsipál 275, organizadu iha área estratéjiku 16 ne’ebé Governu sei foku ba tinan oin hanesan agrikultura, pekuária, peska no floresta, ekonómia no empregu, turizmu, dezenvolvimentu rurál no abitasaun, ambiente, petróliu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasiona internasionál no polítika esterna.
Tuir kalendáriu PN nian, debate proposta lei OJE 2023 tantu jeneralidade, espesialidade sei hahú iha 07 novembru 2022, no 18 novembru aprova finál globál no iha 22 novembru envia ba Prezidente Repúblika hodi halo promulgasaun tuir kompeténsia ne’ebé iha.
Prezidente PN liuhosi plenária tersa ne’e, anúnsiu mós admisaun no baixa ba komisaun C, projeitu lei númeru 36/V(4a)-Kria Fundu ba Dezenvolvimentu Parke Eskolár, hodi fó apresiasaun inisiál relatóriu pareser prazu loron 30. Kona-ba konteúdu no konseitu projeitu lei ne’e ho nia artigu seidauk bele fó sai detallu, tanba komisaun sei hala’o uluk apresisaun.
Notísia relevante: Governu submete ona proposta lei OJE 2023 ba PN
Jornalista : Nelson de Sousa
Editora : Rita Almeida
