PN aprova votu pézames ba falesimentu Jape Kong Su
DILI, 04 outubru 2022 (TATOLI)-Parlamentu Nasionál (PN), aprova votu pézames ba falesimentu na’in ba Timor Plaza, Jape Kong Su, ne’ebé hakotu iis iha loron 26 fulan-setembru tinan ne’e iha Darwin-Austrália ho idade 97.
“Rezultadu votasaun a favór- 48, kontra no abstensaun 0, ho nune’e votu númeru 18/V aprovadu’’, Vise Prezidente PN, Maria Angelina Sarmento, anúnsia liuhosi plenária, tersa ne’e.
Prezidente PN, Aniceto Longuinhos Guterres Lopes, dehan Estadu Timor-Leste fó ona kondekorasaun medalla méritu ba Jape Kong Su ninia dedikasaun no kontribuisaun iha área ekonómia. “Jape Kong Su nia pioneriu ba dinamizasaun ekonómia Timor”.
Votu pezár ne’e aprezenta hosi deputadu proponente Lídia Martins no Felix da Costa ‘Anin Buras’. Deputadu proponente na’in rua hosi bankada Frente Revolusionária Timor-Leste Independente (Fretilin) ne’e konsidera PN presiza fó votu pezar, tanba durante Jape moris, fó ona kontribuisaun ba Timor-Leste iha tempu luta libertasaun no indepedénsia hanesan harii klínika gratuita ba populasaun, inisia kontrusaun Timor Plaza, sentru komersiál dahuluk modernu no alarga konstrusaun edifísiu hodi kontribui ba progresu ekonómiku iha nasaun ne’e hanesan setór turizmu no komérsiu ne’ebé hosik hela legadu di’ak ba jerasaun foun nu’udar exemplu serbisu emprendedorizmu.
Nune’e PN manisfesta profundu pézames ba falesimentu Jape Kong Su no aprezenta sentidu kondolénsia ba família no amigu sira.
Deputadu Partidu Demokrátiku (PD), Adriano do Nacimento, hateten merese hetan dignifikasaun hosi reprezentante povu hosi uma fukun PN. “Tanba avo Jape fó ona kontribuisaun uituan ka barak ba prosesu ukun rasik-aan no depois ukun-aan ema ida mós fó esperansa ba povu Timor no lider mundiál sira katak Timor la’o ba oin hodi loke Timor Plaza, dezenvolve ekonomia’’.
Notísia relevante: PR Horta hato’o sentidu kondolénsia ba falesimentu Jape Kong Su
Jornalista : Nelson de Sousa
Editora : Rita Almeida
