iklan

NASIONÁL, POLÍTIKA

PR Horta hato’o sentidu kondolénsia ba falesimentu Jape Kong Su

PR Horta hato’o sentidu kondolénsia ba falesimentu Jape Kong Su

Matebian Jape Kong Su. Imajen/Espesiál.

DILI, 27 setembru 2022 (TATOLI)—Prezidente Repúblika (PR), José Ramos Horta, hato’o sentidu kondolénsia ba falesimentu Jape Kong Su no família tanba na’in ba Timor Plaza ne’e hakotu iis iha Austrália iha segunda (26/09) ne’e.

Notísia Relevante: PM konsidera Jape Kong Su sai fonte inspiradór ba joven timor-oan

“Ha’u-nia laran susar no laran susar liu, ha’u hato’o kondolénsia ba família Jape. Timor-Leste lakon ema boot ida, emprezáriu estraordináriu. JAPE KONG SU moris naruk. Nia husik hela legadu servisu ida-ne’ebé metin ba nasaun no povu,” PR Horta hato’o liu hosi nia pajina facebook ne’ebé Agéncia Tatoli asesu, tersa ne’e.

Nune’e mós, iha pájina rede sosiál Timor Plaza, família Avo Jape fó sai ba públiku katak Avo Jape Kong Su fila hikas ona ba Maromak Nia uma ho idade 97.

Avo Kong Su sei hetan lembransa hosi nia esposa durante tinan 78 anos ho naran Avo Lai Min Ha. No nia oan sira, Julia, Ian, Kenny, Alan, Wendy, Tony, Connie, Danny, no Pamela, ho nia Beioan sira tomak. Oras ne’e daudaun, nia fila hikas ba mundu rohan laek nian no hamutuk ona ho ho nia oan feto Vicki iha aman Maromak nia kadunan.

Timoroan hotu sei hanoin hikas nia aten berani, dedikasaun, no servisu makaas ne’ebé nunka sente kolen durante nia moris tomak.

Nia esperansa ikus mak fila-fali mai nia rai moris fatin ne’ebé nia hadomi tebes, Timor-Leste. Preparasaun ikus ninian sei hala’o hela no Avo Jape nia mate-isin sei lori mai Dili iha loron 06 outubru 2022. Avo Jape nia familia sei fó hatene loron haloot mate-isin bainhira deside ona data.

Timor-Leste sente lakon boot tanba matebian Jape Kong Su ne’ebé hanesan éroi ba dezenvolvimentu no na’in ba Timor Plaza ne’e hakotu ona iis.

Antes ne’e, iha Darwin Austrália soi shopping center boot, iha Melbourne, Brisbane no Adelaide, maibé nia lahaluha ba nia rai moris fatin Timor-Leste tanba nia iha kompromisu katak Timor Lorosa’e mak nia rain.

“Timor mak ita-nia rai tanba Timor-Leste mak ita iha. Timor-Leste mak fó sorte mai ita. Tanba Timor-Leste mak ita hetan saude di’ak. Tanba Timor-Leste mak ohin loron ita hetan familia boot, ita hetan riku mós mai husi Timor-Leste. Timor-Leste mak hanesan bee-matan ne’ebe moos, ita labele haluha, ita tenke fila ba Timor-Leste ne’e ita-nia rai rasik,” lifaun ne’e Avó Jape ko’alia hodi inspira timoroan sira atu moris banati.

Liafaun inspirasaun ida-ne’e reprezenta Avo Jape nia karáter no ninia imajen moris loloos. Tanba, Antes atu hamriik foho “susesu” ida-nia tutun, nia hahú ninia negósiu hosi buat kiik-oan hanesan loke loja ho tein tua sabu, faan ai-maran no tunu paun.

“Ita ema moris tenke servisu makaas mak foin bele han. Se hakarak sai emprezariu susesu ne’ebé labele tane liman deit ba projetu Governu. Ha’u sempre hateten ita ema moris tenke servisu makaas mak foin han. Labele bosok ema. Labele halo aat ema seluk. Tenke iha komfiansa. Tenke respeita ema seluk. Tenke hatene moe. Labele foti an. Tenke ajuda ema seluk ne’ebé mak presiza ita-nia ajuda. Riku ita la lori,” Avo Jape hateten,

Grupu Jape hari’i husi Jape Kong Su iha Darwin, Territóriu Norte-iha 1976 no pertense hosi família, ne’ebé nia hun iha Timór Lorosa’e. Husi susesu hosi projetu propriedade komersiál iha sentru sidade Darwin nian, iha 1980 ba Grupu Jape benefisiu d’iak no progresu ba dezenvolvimentu suku Dona Jape iha tinan 1989. Iha faze dahuluk nian iha Timor Plaza loke iha uutubru 2011.

Atu dezenvolve Timor-Leste, nia faan nia uma rasik iha Singapura, faan nia ótel iha Xina no nia peñor tiha ninia Shoping Centre (sentru kompras) iha Darwin Austrália mak nia lori osan ne’e mai Timor hodi harii Timor Plaza.

“Iha tinan 2006-2007 ha’u faan tiha ha’u-nia ótel iha Xina, faan ha’u-nia uma iha Singapura depois peñor tiha ha’u-nia shopping centre iha Darwin ba banku hodi hetan millaun $10 hodi aumenta ho ha’u-nia osan rasik millaun$5 mak hodi halo Timor Plaza. Total osan hodi halo Timor Plaza hamutuk millaun $25 milliaun,” Avo jape hatetetn ba jornalista iha tinan 201o liubá ne’e.

Avó Jape nia istória

Jape Kong Su moris iha postu administrativu Balibo, munisípiu Bobonaro, iha 01 outubru 1927 no mate iha 26 setembru 2022. Bainhira nia ho idade tinan tolu (3), nia aman lori nia ba Xina hodi hatama nia ba eskola maibé bainhira Jape ho idade tinan 14, nia fila hikas mai Timor iha tempu Japoñes okupa Timor-Leste.

Jape ninia avó sira hela iha Atambua-Kupang Indonézia depois muda mai Balibo (Bobonaro) no kontinua muda mai Maubara (Liquiça). Iha Maubara, Jape kuda domin ho Maubara-oan no sira konsege hetan labarik na’in-10 iha durante sira forma uma kain. Entre labarik na’in-10 ne’e, na’in hitu moris iha Maubara, na’in-tolu moris iha Dili.

Antes Indonezia invade rai Timor iha 07 dezembru 1975, Avo Jape halo tinan 50 ona. Avo Jape haruka tiha ona nia kaben ho nia oan sira ba hela iha Singapura depois Jape evakua ba Darwin-Austrália. Durante Indonézia harii ninia administrasaun iha Timor-Leste, Avo Jape la fila mai nia rai moris fatin, nia hela iha Darwin hodi halo negósiu no Avó fila mai Timor iha tinan 2000.

Mehi atu dezenvolve Timor-Leste mosu daudaun iha nia neon. Iha 2007, Avo Jape hahú sosa rai hosi na’in ba rai família Marí Alkatiri nia rai iha Comoro, ne’ebé daudaun ne’e harii uma andar tolu (3) ne’ebé hanaran Timor Plaza (TP), maibé antes ne’e Avo Jape loke supermerkadu Leader.

Antes Avó Jape sai ema susesu, iha tempu Japoñeza bainhira nia sei hela iha Maubara, Avo Jape fila liman loke kioske kiik ida hodi tein rua sabu. Hosi esperiémsia tein tua sabu ne’e, agora Avo Jape sai emprezáriu kuñesidu iha Timor-Leste iha mundu negósiu nian.

Iha 1960, Avó Jape muda hosi Maubara mai hela iha Dili, hodi hela loos iha Bidau hamutuk ho nia oan na’in-10. Iha tinan hanesan, nia haruka nia oan ho nia feen-kaben ba  hela iha Singapura, tanba Avo Jape sosa uma iha ne’ebá, nune’e nia oan sira bele eskola iha Singapura.

Avo Jape bele halo hanean ne’e, tanba nia rona no inspira hosi nia profesór nia liafuan ne’ebé hateten “Se iha manu-tolun labele tau hamutuk iha fatin ida maibé tenke tau iha fatin rua, atu nune’e fatin ida monu manu-tolun rahun karik, manu-tolun rai iha fatin seluk ne’e sei iha”.

Ho nune’e, iha 1970, Avó Jape ba sosa uma iha Singapura hodi haruka nia oan ba eskola iha ne’eba, tanba nia hanoin katak rai Timor-Leste keta loron ruma ladi’ak karik, nia sei sei iha osan para fila-fali mai.

Aleinde ne’e, ninia aman mós hanorin nia ho liafuan motivasaun, “Bainhira ita manán osan atus ida, ita tenke tau hela lima nulu ba banku. Osan ne’e ita labele book, labele foti hodi sosa fali karreta. Se ita manán osan rihun ida hanesan ne’e, ita manán atus lima tanba ita tenke rai hela atus lima iha banku, nune’e aban bainrua ita moras karik, ita bele hasai osan ne’e hodi halo tratamentu”.

Notísia Relevante: Jape Kong Su reafirma komprimisu dezenvolve Timor-Leste

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!