iklan

NASIONÁL, HEADLINE, KAPITÁL

PM konsidera Jape Kong Su sai fonte inspiradór ba joven timor-oan

PM konsidera Jape Kong Su sai fonte inspiradór ba joven timor-oan

Jestór Dili Development Company, Tony Jape, dudu hela na’in ba Timor Plaza, Jape Kon Su, ho kadeira roda, iha ámbitu Feira iha Timor Plaza, kuarta (27/04). Imajen Tatoli/Francisco Sony

DILI, 27 setembru 2022 (TATOLI)–Primeiru-Ministru (PM), Taur Matan Ruak, triste bainhira simu informasaun, katak na’in ba Timor Plaza, Jape Kong Su, hakotu-iis, iha Austrália, tersa ne’e.

“Ha’u triste loos rona ohin dadeer Avo Jape mate ho idade 97, Avo Jape sai fonte inspirasaun boot ba joven sira, liuliu sira ne’ebé iha rai-li’ur, ne’ebé durante funu organiza sira-nia vida atu hetan kondisaun ekonomia finanseira oituan no funu hotu nia lori nia-oan sira mai halo investimentu iha Timor-Leste hanesan Timor Plaza, entaun ita lakon avo ida fó motivasaun boot ba timor-oan sira, katak bele ba ne’ebé de’it, hetan fatin iha ne’ebé de’it maibé ita-nia rain nunka bele haluha, entaun ha’u senti triste tanba ita lakon Avo Jape,” PM Taur hateten iha Ministériu Finansa (MF), Aitarak-laran.

Notísia relevante: Governu apresia Jape halo doasaun konstrusaun edifísiu Administrasaun Postu Administrativu Maubara

Xefe Governu dehan, Timor-Leste lakon nia eroi boot Jape, ne’ebé dedika kuaze nia vida balun hodi kontribui ba prosesu dezenvolvimentu nasionál.

“Nia obra no memória sei nafatin metin ba iha povu Timór nia fuan,” nia akresenta.

Nune’e, nia espera Jape nia oan sira bele kontinua espíritu ne’ebé sai inspiradór ba ema hotu.

“Ha’u fiar nia oan sira bele lori espíritu ne’e ba oin no hada’et tan ba timor-oan sira hotu tanba moris sai ba rai-li’ur maibé sira moris iha Timór, entaun tau-matan ba Timór,” Xefe Ezekutivu tenik.

Tuir informasaun, mate-isin sei lori mai Dili hodi haloot iha loron 06 outubru.

Antes ne’e, Jape Group harii Timor Plaza hosi Dili Development no halo lansamentu iha outubru 2011.

Timor Plaza kompostu hosi shopping mall, otél, eskritóriu, entertaiment center, fatin jinástiku no seluk tan.

Durante ne’e Jape halo konstrusaun iha fatin seluk ne’ebé kontribui ba dezenvolvimentu, hanesan edifísiu postu administrativu Maubara ho kustu $195.000.

Jape Kong Su moris iha Balibo, iha loron 01 outubru 1927.

Jornalista   : António Gusmão

Editora        : Julia Chatarina

iklan
iklan

Leave a Reply

iklan
error: Content is protected !!