DILI, 05 outubru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu, ne’ebé aprezenta hosi Primeiru-ministru (PM), Taur Matan Ruak, ba kriasaun Komisaun Koordenasaun Téknika ba Elaborasaun relatóriu daruak Revizaun Nasionál Voluntária (RNV) kona-ba progresu implementasaun Objetivu Dezenvolvimentu Sustentável (ODS).
“Komisaun téknika ne’e sei responsável rekolla dadus progresu nasionál sira iha implementasaun ODS nian, ho rekursu konsulta boot no konsidera rezultadu avaliasaun Estadu implementasaun hosi Planu Estratéjiku Nasionál tinan 2011 – 2030, ne’ebé konklui iha tinan 2021, ho objetivu atu avalia situasaun atuál no permite atualiza rezultadu sira ne’ebé reporta hosi Timor-Leste iha tinan 2019,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: MOP investe millaun $36 tinan ne’e ba meta ODS 6 bee-moos
Aleinde ne’e, koordenasaun no asisténsia téknika no administrativa ba komisaun sei asegura hosi Tékniku Ajénsia Nasionál Planeamentu, Monitorizasaun no Avaliasaun (ANAPMA), no mós komisaun reprezentante hosi Prezidénsia Repúblika no Parlamentu Nasionál, departamentu no organizasaun governamentál relevante, sosiedade sivil, setór privadu ekonomia, Universidade Nasionál Timor-Lorosa’e (UNTL), no Rádiu no Televizaun Timor-Leste (RTTL).
Partisipa mós reprezentante ida hosi Koordenadór Rezidente Organizasaun Nasaun Unida iha Timor-Leste, ho estatutu observadór no sein direitu ba votu.
“Relatóriu no rezultadu sira ne’e sei aprezenta iha tinan 2023, ba fórum polítiku nível a’as iha Nasaun Unida kona-ba Objetivu Dezenvolvimentu Sustentável iha Nova Iorke, hafoin aprovasaun hosi Konsellu Ministru,” nia akresneta.
Jornalista : Antónia Gusmão
Editora : Julia Chatarina
