DILI, 05 outubru 2022 (TATOLI)—Ministériu Turizmu Komérisu no Indústria (MTKI), kuarta ne’e, konklui distribuisaun produtu Cesta Bázika ba komunidade iha suku Lahomea, postu administrativu Maliana, munisípiu Bobonaro.
“Benefisiáriu 5.417 simu produtu Cesta Bázika, reklamasaun 246, ne’ebé reklamante hirak ne’e hein sertifikasaun hosi Autoridade Lokál no Ministériu Administrasaun Estatál,” refere nota ne’ebé Agência Tatoli asesu, kuarta ne’e.
Suku Lahomea kompostu hosi aldeia lima, ne’ebé durante prosesu distribuisaun Cesta Bázika, Governu kontratu empreza Nahliva Unipessoal ho totál orsamentu $292.050.
Empreza distribui produtu oin 19 hanesan foos, manu-tolu, na’an no seluk tan, ne’ebé hosi produtu sira ne’e maioria tuir regulamentu Governu, ho produtu rai-laran 75%.
Notísia relevante: MTKI hahú distribui Cesta Bázika ba komunidade Ataúro
Ministériu liuhosi Grupu Traballu Ezekusaun no Implementasaun Programa Cesta Bázika ho empreza distribuidór sira kontinua hala’o prosesu distribuisaun.
Tuir polítika implementasaun programa Cesta Bázika hodi rekopera filafali ekonomia ne’ebé monu tanba surtu COVID-19 no kalamidade públika inklui situasaun polítika rai-laran, ho objetivu atu hakbiit fali aktividade empreza nasionál no halo sirkulasaun moeda hosi nasionál to’o povu agrikultór, aleinde ne’e haforsa produsaun alimentár.
Iha distribuisaun Cesta Bázika, Governu iha regulamentu kona-ba sidadaun sira ne’ebé laiha direitu atu simu Cesta Bázika hanesan titulár eis-titulár, kargu diretór no xefe departementu sira inklui sidadaun sira ne’ebé mak simu saláriu liu $500 ba laten.
Jornalista : Arminda Fonseca
Editora : Julia Chatarina
