DILI, 20 setembru 2022 (TATOLI)–Ministériu Turizmu Komérsiu no Indústria (MTKI) hahú halo distribuisaun Cesta Bázika iha Vila Maumeta, munisípiu Ataúro iha loron 15 setembru 2022.
Xefe Gabinete Reprezenta Administradór munisípiu Ataúro, Lúcio Boromeu, hateten, nia parte apresia tebes ho Governu nia polítika ne’ebé fahe ai-han ba povu.
“Polítika Governu implementa programa Cesta Bázika hodi rekopera ekonomia rai-laran hafoin Timor-Leste hasoru pandemia globál no kalamidade públika, ho objetivu atubele insentiva agrikultór sira hasa’e produsaun agíkola no parte seluk apoiu empreza sira nia atividade no fó serbisu ba timor-oan sira,” Xefe Gabinete Reprezenta Administradór munisípiu Ataúro, hateten liuhosi nota ne’ebé Agência Tatoli asesu, tersa ne’e.
Notísia relevante: Abitante Ponilala 4.906 simu ona Cesta Bázika
Governu kontrata empreza Agrobisnis Atauro, Lda hodi fahe ba benefisiáriu hamutuk 11.588 iha Ataúro.
Distribuisaun produtu Cesta Básiza iha loron dahuluk fahe ona iha suku Vila Maumeta ba benefisiáriu hamutuk 518.
Reprezenta hosi MTKI, Armando Filomeno Alves, dehan, komunidade hotu iha direitu atu hetan produtu Cesta Bázika, ba hirak ne’ebé mak durante distribuisaun laiha naran, bele reklama sira-nia direitu ba meza atu nune’e bele buka solusaun hodi rezolve.
Distribuisaun Cesta Bázika tuir reprezentante empreza katak sei fahe hotu tuir tempu ne’ebé iha tanba produtu ba benefisiáriu sira kuaze prontu hotu ona.
Jornalista : Arminda Fonseca
Editora : Julia Chatarina
