DILI, 19 setembru 2022 (TATOLI)–VIII Governu Konstitusionál liuhosi Ministériu Turizmu Komérsiu no Indústria (MTKI) iha loron 17 setembru, distribui ona produtu Cesta Bázika ba abitante 4.906 suku Ponilala, postu administrativu Ermera, munisípiu Ermera.
“Governu kontrata empreza Jake Lda, hodi toma-konta prosesu distribuisaun iha suku Ponilala, ba benefisiáriu 4.906 hosi aldeia lima hanesan aldeia Cotaheu ba abitante 1.073, Erohou ba abitante 569, Hatuposi 820, Nunupu 1.037 no Sacoco 1.407,” refere nota ne’ebé Agência Tatoli asesu, segunda ne’e.
MTKI konfirma karik hosi lista benefisiáriu, iha abitante balun mak naran seidauk tama lista, bele hato’o reklamasaun diretamente ba meza iha lokál distribuisaun produtu Cesta Bázika.
Instituisaun sira ne’ebé partisipa halo monitorizasaun ba distribuisaun ne’e hosi ekipa MTKI, Komisaun Antí-Korrupsaun (CAC, sigla portugés), Autoridade munisipál, hamutuk ho empreza distribuidór.
Tuir peskiza distribuisaun Cesta Bázika faze dahuluk iha tinan 2021, programa ne’e fó impaktu pozitivu ba produsaun produtu agríkola iha rai-laran ho ninia kuantidade ne’ebé a’as kompara ho tinan sira antes.
Notísia relevante: MTKI rejista reklamente 6.512 Cesta Bázika faze daruak hosi suku haat
Tanba ne’e, Governu nia desizaun iha distribuisaun Cesta Bázika faze daruak, maioria produtu tenke mai hosi lokál ho 75% no restu hosi importasaun, ho objetivu atu insentiva komunidade agrikultór atu prodús barak liután.
Aleinde ne’e, programa nasionál ne’e nu’udar faze ida atubele sirkula moeda iha rai-laran no fó apoiu finanseiru ba komunidade no atividade negósiu empreza.
MTKI hahú lansamentu distribuisaun iha juñu tinan ne’e, hosi suku Comoro aldeia Baia-Leste, Fomento I to’o Fomento III, Naroman no aldeia Golgota.
Iha suku Ritabou, postu administrativu Maliana, munisípiu Bobonaro iha abitante 7.711 hosi aldeia 12 mak simu ona produtu Cesta Bázika, kompostu hosi aldeia Daetete 573, Uat 905, aldeia Ritabou 781, Na’ahui 501, Maganutu 533, Timatan 676, Ritiudu 393, Diruaben 755, Corluli 337, Halecou 661, Moleana 648, Samelaun 948.
Iha suku Poetete, postu administrativu Ermera Vila, munisípiu Ermera hahú distribuisaun iha loron 30 juñu 2022 hosi empreza Betuhei, ba benefisiáriu hamutuk 11.768 iha aldeia 12, kompostu hosi Tidibisi 325, Lequisi 1826, Loblala 678, Biluli 1.368, Poepun 785, Taklela 1.442, Rematu 744, Samatrae 1.451, Urleteho 1.094, Villa 966, Urluli 636 no Gueguemara 441, hamutuk ho reklamante 1.010.
Distribuisaun Cesta Bázika iha aldeia Baia-Leste, Fomento 1 to’o Fomento III, aldeia Naroman no aldeia Golgota, munisípiu Dili, reponsável distribuisaun hosi empreza Leader, enkuantu ba suku Dato, munisípiu Liquiçá responsável ba distribuisaun hosi empreza Hanaroman Brilliant ba suku haat ne’ebé mak distribui ona no sei hein lista validasaun hosi Ministériu Administratasaun Estatál (MAE).
Implementasaun programa Cesta Bázika ba faze daruak bazeia ba dekretu-lei númeru 10/2022 04 marsu, hosi MTKI no Sekretaria Estadu Kooperativa (SEKoop) nu’udar entidade implementadór, bazeia ba koordenasaun hosi Ministériu Koordenadór Asuntu Ekonómiku (MKAE).
Jornalista : Arminda Fonseca
Editora : Julia Chatarina
