DILI, 05 outubru 2022 (TATOLI)-Prezidente Konsellu Administrasaun Eletrisidade Timor-Leste, Empreza Públika (EDTL, EP), Paulo da Silva, akompaña hosi membru konsellu administrasaun, kuarta ne’e hala’o audénsia ho Prezidente Repúblika (PR), hodi relata serbisu sira EDTL-EP nian.
“Ohin, mai partilla ho Prezidente Repúblika kona-ba serbisu EDTL-EP halo depois transforma hosi Diresaun Jerál mai empreza públika hahú tinan kotuk”, Prezidente EDTL-EP ba jornalista hafoin enkontru ho Xefe Estadu iha Palásiu Prezidensiál, Bairru Pite.
Paulo da Silva hatutan, durante sorumutu relata progresu sira ne’ebé EDTL-EP hala’o no inisiativa ne’ebé iha atu mellora serbisu eletrisidade ninian hanesan kolleta reseita, kobertura ba populasaun ne’ebé seidauk asesu enerjia eletrisidade, planu enerjia alternativu oinsá hatún kustu produsaun enerjia no poupansa.
“Asesu enerjia elétrika ita halo programa eletrifikasaun nasionál, liuliu suku sira seidauk asesu eletrisidade, entaun EDTL-EP halo programa fahe ba faze tolu; dahuluk projetu 44 kobre suku 24, daruak projetu 34 kobre suku 17 no ida seluk projetu 36 kobre suku 23 ne’e implementasaun la’o hela”, nia esplika.
Nia hatutan tan, faze dahuluk projetu la’o iha suku neen mak konklui 100%, balun la’o hela, espera tempu badak bele konklui tan, ba faze daruak tama ona implementasaun kompañia hahú konstrusaun iha terenu no faze datoluk agora atu finaliza, tama ona avaliasaun téknika ho finansiál, la kleur tan asina kontratu ho kompañia sira implementa. Hela suku tolu hanesan Fatukalu-Same, Fatumakere-Manatuto ho Fatumea-Suai sei lansa konkursu semana oin.
Tinan ne’e promove suku hotu prosesu eletrifikasaun ho espetativa iha fin anu, maioria hosi projetu sira, konklui populasaun bele asesu naroman. Ba aldeia sira ne’ebé seidauk, Paulo da Silva, hateten EDTL hamosu ona polítika eletrifikasaun komunitária, sei serbisu hamutuk ho komunidade hodi aselera. “Nune’e populasaun labele hein tan, tanba tinan 20 ona sira hein”, afirma.
Iha parte seluk, Prezidente EDTL ne’e atualiza programa instalasaun kontadór ba populasaun no tinan kotuk sosa ona prepagu rihun 108 hodi instala ona, hahú fulan outubru to’o daudaun rihun 76 iha territóriu. “Ho inspesaun rutina, hosi ne’e konsege hasa’e reseita to’o hosi janeiru-setembru 2022 kolleta ona millaun $34.4, nune’e projesaun ba tinan ne’e sei hetan millaun $40”, katak nia.
EDTL mós implementa programa kona-ba estudu rua hanesan konversaun disel ba gás konklui ona no estudu viabilidade ba solár panel (enerjia hosi loron) la’o hela iha faze finalizasaun.
“Ita espera tempu besik konklui estudu, depois ita haree opsaun kona-ba dezenvolvimentu no fin anu bele lansa konkursu solár PV nune’e bele implementa, hosi estudu ne’e identifika Manatuto fatin prefere bele dezenvolve entre 72 to’o 80 mgw, ida ne’e oinsá atu hatún kustu produsaun tanba kada tinan Estadu tau osan millaun $108 até $110 atu sosa kombustivel ba sentrál Hera no Betano entaun bo’ot tebes”, Direjente EDTL ne’e akresenta.
Direjente ne’e mós relata programa hadi’a fornesimentu enerjia elétrika, EDTL promove projetu dijitalazaun ba liña distribuisaun ne’ebé foti fundu emprestimu millaun $35 hosi Banku Dezenvolvimentu Áziatiku (ADB, siglá inglés), hahú tinan ne’e promove programa refere.
”Tanba bainhira akompaña ahi mate susar tebes, téknika sira atu deteta kauza hosi saida tanba sistema sei manual no projetu ne’e sei ajuda dijitaliza bainhira buat ruma akontese tékniku direitamente halo intervensaun lalais”, katak tan.
Durante sorumutu, nia dehan Xefe Estadu kontente ho serbisu ne’ebé EDTL iha, mezmu dezáfiu barak nune’e husu kontinua mellora di’ak liután serbisu hodi hadi’a fornesimentu no oinsá hatún presu eletrisidade.
Notísia relevante: PM fó orientasaun ba EDTL “tinan ne’e suku hotu tenke asesu enérjia elétrika”
Jornalista : Nelson de Sousa
Editora : Rita Almeida
