DILI, 05 outubru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei kona-ba alterasaun dahuluk rejime remuneratóriu FALINTIL-Forsa Defeza Timor-Leste (F-FDTL), ne’ebé aprezenta hosi hosi Ministru Defeza, Filomeno da Paixão de Jesus.
“Kona-ba alterasaun ba rejime remuneratóriu ne’e iha aumentu alterasaun sira ne’ebé mak Konsellu Ministru konkorda no aprova,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Saláriu F-FDTL no PNTL aumenta 5% no atualiza suplementu remuneratóriu
Liuhosi númeru 2 artigu da-23 hosi dekretu-lei númeru 34/2021, loron 22 dezembru, Estadu kompromete katak ba tinan 2023 atu aumenta 15% militár sira-nia remunerasaun, ne’ebé hodi konsidera alterasaun lejizlativa kona-ba suplementu iha ámbitu administrasaun públika nasionál nian.
Projetu ne’e ho ninia objetivu atu introdús modifikasaun sira tantu iha nivel estrutura remuneratóriu, tantu iha nivel suplementu sira ne’ebé eziste iha F-FDTL.
Antes ne’e, iha 24 setembru 2021, Governu deside halo aumentu salariál 5% iha postu militár hotu no halo atualizasaun ba suplementu remuneratóriu sira ho objetivu atu hetan karreira militár ne’ebé atrativa liu, ho kondisaun salariál ida tuir modernizasaun no profisionalizasaun hosi Forsa Armada sira.
Jornalista : Antónia Gusmão
Editora : Julia Chatarina
