DILI, 05 outubru 2022 (TATOLI)-Sekretáriu Estadu Ambiente (SEA), Demétrio do Amaral de Carvalho, konvida Prezidente Repúblika (PR), José Ramos Horta, atu partisipa konferénsia altu nivel ba mudansa klimátika ne’ebé sei realiza iha loron 14-17 fulan novembru, iha Ejitu.
“Ohin, mai audénsia hodi husu Prezidente Repúblika atu bele partisipa iha konferénsia ba dala-27 iha Ejitu, segimentu altu nivel ba mudansa klimátika nian”, Sekretáriu Estadu ba jornalista hafoin sorumutu ho Xefe Estadu iha Palásiu Prezidensiál, Bairru Pite.
Demétrio Amaral hatutan, PR hanesan Premiadu Nobel ba Pás bele sai figura sentrál ida iha kampaña no defeza ba justisa klimátika iha forum altu nivel ne’e. “Prezidente espressa sei tenta posivel atu partisipa”.
Governante ne’e hakarak hato’o agradesimentu ba Xefe Estadu ne’ebé hato’o mensajen iha sesaun Asembleia Jerál Organizasaun Nasoins Unidas (ONU) foin lalais iha Nova Iorke, tau mós atensaun ba asuntu alterasaun klimátika.
Durante sorumutu, membru oitavu Governu konstituisional ne’e husu mós Xefe Estadu nia apoiu atu komunika ho parte Indonézia, haree posibilidade kooperasaun ho Timor-Leste (TL) ba base part (plataforma) ida bele partilla rekursu tasi no tasi ninin nian entre rai rua.
“Espesialmente ita fahe rai ho Nusa Tengara Timur (NTT)-Indonézia iha illa lubun ida ne’ebé haleu Timor halo interasaun ho ita”, katak nia.
Se bele TL estabelese base part ida asegura partisipasaun populasaun ninian iha uza sustentavel ba rekursu oseaniku no mariñu.
Durante sorumutu, nia dehan Xefe Estadu pronúnsia katak iha komunikasaun di’ak ho Ministru Indonézia tau matan ba tasi no iha mós relasaun di’ak ho Governadór NTT inklui relasaun di’ak ho Prezidente Repúblika Indonézia, Joko Widodo, ho ida ne’e bele iha diskusaun hodi haree posibilidade sira.
Notísia relevante: TL-UE Asina Akordu Atu Kombate Efeitu Mudansa Klimátika
Jornalista : Nelson de Sousa
Editora : Rita Almeida
