SERVE prosesa ona kioske 46 hosi Pássabe-Nítibe atu hetan lisensiamentu komersiál
OÉ-CUSSE, 05 outubru 2022 (TATOLI) – Servisu Rejistrasaun no Verifikasaun Emprezariál Institutu Públiku (SERVE,IP) sukursál Rejiaun Administrativa Espesiál Oé-Cusse Ambeno (RAEOA), daudaun ne’e prosesa ona dokumentu 46 atu hetan lisensiamentu ba atividade komersiál mai hosi sub-rejiaun Pássabe no Nítibe.
Koordenadór SERVE, IP, sukursál RAEOA, Reinaldo António Mendonça, esplika, dokumentu 46 ne’e halibur liuhosi programa rejistu movél iha baze, atu fasilita komunidade hodi trata dokumentu lisensiamentu komersiál.
Nia informa, dokumentu 46 maioria laiha dokumentu lisensiamentu ba atividade komersiál mai hosi sub-rejiaun Pássabe, suku Abani iha kioske 10, suku Malelat iha kioske lima, no iha sub-rejiaun Nítibe, suku Bene-Ufe iha 13 no Suni-Ufe iha 18.
Tuir nia, komersiante barak laiha dokumentu sidadania, hanesan eleitorál, billete identidade sertidaun batizmu no sertidaun RDTL.
“ Progranma rejistu movél ami hahú uluk iha Pássabe iha 15 agostu to’o setembru 2022, rejista komersiánte iha suku Abani hanesan loja no kioske eziste ona iha suku ne’e hamutuk 10, maibé loja 10 ne’e hotu-hotu laiha legalidade atividade komersiál hosi SERVE, maibé sira hala’o tinan barak ona,” Reinaldo Antonio Mendonça, hatete iha Oé-Cusse, kuarta ne’e.
Maibé hafoin remata identifikasaun iha suku Abani, ekipa SERVE fasilita halibur dokumentu prosesa ona iha sistema no daudaun ne’e iha kioske na’in-ualu konsege trata ona dokumentu legalidade, hela na’in-rua maka seidauk tanba seidauk iha dokumentu sidadania.
Ba fali suku Malelat, iha kioske neen mak eziste iha suku ne’e, maibé iha kioske ida maka dokumentu legalidade kompletu, enkuantu lima seluk seidauk iha lisensa negósiu, to’o ohin loron tanba ho razaun seidauk iha dokumentu sidadania.
Iha segunda faze hahú fulan setembru nia laran, ekipa SERVE kontinua atividade rejistu movél iha sub-rejiaun Nítibe alvu ba suku rua, iha Bene-Ufe iha aldeia tolu no Suni-Ufe mós iha aldeia tolu tanba maioria suku ne’e hala’o atividade negósiu.
“Iha Nítibe kondisaun hanesan mós iha Pássabe, maibé ami foin mak rekolla dadus ba prosesamentu dokumentu hatama iha sistema, legalidade seidauk, tanba barak mak seidauk iha dokumentu sidadania,” nia katak.
Maibé ekipa SERVE konsege halibur dokumentu iha suku Bene-Ufe iha kioske hamutuk 13, no bainhira SERVE realiza sensibilizasaun iha na’in-hitu entusiazmu atu hala’o atividade negósiu.
Nune’e mós iha suku Suni-Ufe, ekipa konsege halibur dokumentu iha kioske ne’ebé eziste iha suku ne’e hamutuk 18, no partisipante iha sensibilizasaun iha ema na’in-rua maka iha interese atu hala’o atividade negósiu.
Nune’e atu solusiona problema ne’e, parte SERVE ho ekipa enkoraja bainhira prezensa SERVE iha baze, konsege halo sensibilizasaun ho rejistu tama uma sai uma, karik komunidade balu presiza hala’o atividade negósiu entaun tenke iha lisensa komersiál hosi SERVE.
Jestór sub-rejiaun Pássabe, Anton Ulan, agradese tanba bainhira ekipa SERVE to’o iha komunidade sira, parte autoridade lokál voluntariamente serbisu hamutuk hodi enkoraja komunidade iha área rurál atu iha koñesimentu.
“Programa ida-ne’e bainhira to’o iha baze, ita-nia autoridade lokál sira hanesan xefe suku, aldeia no konsellu suku entusizmu atu serbisu hamutuk durante rejistu movél, tanba foin dahuluk SERVE tún direita ba komunidade atu fó hatene kona-bá legalidade, tanba durante ne’e komunidade hela dook hosi kapitál,” nia orgullu.
Tuir dadus dezde Governu destaka SERVE.IP, iha Oé-Cusse iha 2018 rejista empreza hanesan Enin, Unip.Lda no SA hamutuk 219, iha 2019 SERVE konsege rejistu foun 119, iha 2020 rejistu foun 99.
Nune’e mós iha tinan 2021 hosi janeiru to’o juñu rejistu foun hamutuk 101, no totál hamutuk hosi 2018 to’o juñu 2021 SERVE sukursál Oé-Cusse simu rejistu foun hamutuk 538.
Notísia relevante: SERVE, I.P inisia rejistu móvel ba empreza territóriu laran iha agostu
Jornalista : Abílio Elo Nini
Editór : Evaristo Soares Martins
