iklan

NASIONÁL, KAPITÁL

2023, SLPMD planea kapasita funsionáriu loke konkursu públiku

2023, SLPMD planea kapasita funsionáriu loke konkursu públiku

Ilustrasaun

DILI, 06 outubru 2022 (TATOLI)-Koordenadór Servisu Lisensiamentu Publisitáriu Munisípiu Dili, (SLPMD), Julio F. L do Rosário, informa iha tinan 2023 Servisu Lisensiamentu Publisitáriu Munisípiu Dili, planea kapasita funsionáriu oinsá loke konkursu públiku ba empreza sira, nune’e pasa bele halo atividade negósiu.

“Ami-nia planu ne’ebé durante ami estabelese ba etapa dahuluk ami hakarak atu tuir mós formasaun kona-ba tenderizasaun (Konkursu), oinsá loke konkursu públiku ba emprezáriu sira atu emprezáriu sira bele submete, atu nune’e emprezariu hotu antes hala’o atividade presiza mós liu tenderizasaun. Maibé, ida ne’e sei iha etapa planeamentu no ami mensiona ona ba plánu 2023, maibé ne’e depende desizaun hosi superiór sira, karik planu ne’e aprovadu, entaun iha 2023 ami la’o tuir planu ne’e atu ami bele atinji servisu ne’ebé planeadu ona,” Júlio F. L do Rosário, hateten ba Ajénsia Tatoli iha nia knaar fatin, Díli, kuarta ne’e.

Tuir nia, bainhira funsionáriu sira tuir ona formasaun ne’e Servisu Lisensiamentu Publisitáriu Munisípiu Dili loke ona konkursu públiku ba emprezáriu sira hodi submete, atu nune’e empreza ne’ebé liu sira bele halo atividade, nune’e bele hatama reseita ne’ebé di’ak ba kofre Estadu.

“Ezemplu, foin dadaun iha Covid-19 ne’ebé afeita ba ita-nia rain, dala ruma ita ezize emprezáriu sira atu selu, maibé sira buka razaun katak afeita ba krize kona-ba Covid-19 halo sira la hetan rendimentu atu selu taxa publisitáriu, entaun liuhosi ida ne’e motiva ami atu halo fila-fali planu oinsá ba emprezariu hirak ne’ebé hala’o atividade kona-ba publisitáriu presiza liuhosi konkursu ida, atu nune’e sira liu ona konkursu ne’e bele hala’o atividade, maibé iha tinan ne’e nia klaran mak afeita problema no krize ruma konsekuénsia kada kompañia ida-idak,” nia esplika.

Maibé, ida-idak mak hala’o atividade ho individualmente, entaun afeita krize hanesan Covid-19, dala ruma sira dada aan no buka razaun oioin.

“Oitavu Governu foin daudaun mós la taka dalan no nafatin halo planu oinsá suporta ba kompañia hirak ne’ebé la hetan benefisiu iha krize Covid-19. Entaun, emprezáriu sira ne’e hetan tiha benefísiu no suportasaun hosi Oitavu Governu , liuhosi seguransa sosiál, maibé sira nafatin buka razaun oi-oin atu lakohi selu taxa publisitáriu, maibé ami nafatin ezize atu sira bele kumpri regra sira ne’ebé Estadu estabelese ona,” nia afirma.

Maske nune’e, nia akresenta, durante ne’e Servisu Lisensiamentu Publisitáriu Munisípiu Dili seida’uk loke tenderizasaun ba emprezáriu sira atu submete, tanba bainhira atu loke tenderizasaun presiza mós promove funsionáriu sira.

“Tanba, ita-nia funsionáriu sira ne’ebé servisu ba área ne’e presiza liuhosi formasaun, atu nune’e lala’ok kona-ba tenderizasaun ne’e sira hatene no domina ona, maibé kuandu seida’uk iha formasaun ruma ami seidauk bele loke tenderizasaun ne’e, entaun ami nafatin esforsu halo planu atu oinsá ami-nia superior no Nai ulun sira bele tau mós importánsia ba ami-nia atividade ne’e, nune’e bele fó formasaun ba ami-nia funsionáriu sira atu bele iha esperiénsia ida kona-ba lala’ok tenderizasaun atu sira bele loke tenderizasaun, nune’e emprezáriu hotu bele kompete,” Koordenadór ne’e salienta.

Notísia relevante:Juñu-jullu 2022 : AMD rekolla taxa publisidade $16,769.14

Jornalista : Nelia Fernandes
Editór : Rafy Belo

iklan
iklan

Leave a Reply

iklan
error: Content is protected !!