iklan

NASIONÁL, HEADLINE, KAPITÁL

Família haloot ona Jape Kong Su iha Hera

Família haloot ona Jape Kong Su iha Hera

Família akompaña ekipa seguransa Pax Protector lori kaixaun matebian Jape Kong Su, tau iha karreta funeráriu iha Aeroportu Internasionál Nicolau Lobato, hodi transporta ba fatin ikus, Hera, kinta (06/10). Imajen Tatoli/Francisco Sony

DILI, 06 outubru 2022 (TATOLI)–Família haloot ona na’in ba Timor Plaza, Jape Kong Su, kinta ne’e, iha Hera, postu Administrativu Cristo Rei, Munisípiu Dili.

Mate-isin Jape ne’ebé tula ho karreta funeráriu to’o iha fatin haloot iha tuku 11:25, no kaixaun taka ho bandeira Repúblika Demokrátiku Timor-Leste (RDTL).

Oan hosi Jape, Alan Jape,  sente triste tanba lakon sira-nia aman ne’ebé serbisu maka’as tebes ba dezenvolvimentu.

“Loron ohin loron triste tanba ita la haree tan avo nia oin no la rona ninia liafuan murak sira. Ita labele sente ona ninia domin no laran luak ba ita, mate mak hafahe ita, lakon domin aman nian no tristeza aman nian hanesan tristeza ida ne’ebé mai ami oan sira atu lakohi hasoru, maibé ita labele ses-an hosi laran kanek ne’e. Laran kanek ne’ebé profundu tebes iha ita-nia fuan, nia domin hela nafatin ho ami hotu nia fuan no ninia dedikasaun sei nafatin ho ami iha ne’e no nunka atu haluha,” Alan Jape hato’o liafuan ikus reprezenta família iha serimónia fúnebre Jape Kong Su, iha Hera.

Notísia relevante: PN aprova votu pézames ba falesimentu Jape Kong Su

Molok haloot Jape Kon Su iha nia fatin ikus, komisaun organizadora loke vídeo ne’ebé relata atividade Jape nia iha vida negósiu tantu rai-laran no rai-li’ur.

Aleinde ne’e, durante akompaña ba fatin ikus, la autoriza ema hotu ba maibé autoriza de’it família sira.

Reprezentante trabalhadór Timor Plaza, Zélia Belo, sente triste tanba durante ne’e serbisu direta ho Jape desde tinan 2009 to’o ohin loron.

“Ha’u serbisu hamutuk ho avo Jape tinan-10 nia laran. Ha’u apreende ona buat barak hosi avo. Nia hanesan ema ne’ebé inspiradór tebes tanba nia hanorin ita sai ema onestu, serbisu maka’as no dedikadu bainhira ita hala’o knaar iha serbisu fatin,” nia tenik.

Tuir Zélia Belo, Jape Kong Su iha mehi no dedikasaun maka’as tebes ba Timor-Leste.

“Fiar katak ninia oan sira sei kontinua serbisu hodi realiza mehi sira ne’e,” nia dehan.

Serimónia fúnebre ne’e partisipa hosi Prezidente Repúblika José Ramos Horta, Primeiru-Ministru Taur Matan Ruak, Prezidente Parlamentu Nasionál Aniceto Guterres, membru Governu balun, korpu diplomátiku, setór privadu nasionál no internasionál, inklui família boot Jape Kong Su hosi Austrália no Maubara.

Jape Kong Su moris iha Balibo iha loron 01 outubru 1927 no hakotu-iis iha Austrália iha loron 26 setembru 2022 no ohin dadeer família transporta mate-isin mai Dili hodi haloot.

Antes ne’e, Jape Group harii Timor Plaza hosi Dili Development no halo lansamentu iha outubru 2011, ne’ebé kompostu hosi shopping mall, otél, eskritóriu, entertaiment center, fatin jinástiku no seluk tan inklui halo konstrusaun iha fatin seluk ne’ebé kontribui ba dezenvolvimentu hanesan edifísiu postu administrativu Maubara ho kustu $195.000.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!