Notisia ne’e laiha buat foun ida atu publika Komisaun A ho Governu hahú diskute lejislativa limitasaun idade reforma
DILI, 06 outubru 2022 (TATOLI)-Komisaun A ne’ebé trata asuntu Justisa no Konstituisional iha Parlamentu Nasionál (PN), hahú halo audénsia ho Governu hodi diskute proposta lei númeru 43/V(4a)-autorizasaun lejislativa iha matéira fixasaun limite idade relasaun serbisu ba Funsionáriu Públiku (FP) no ajente administrasaun públika.
Entidade ne’e mak Prezidénsia Konsellu Ministru (PCM, siglá portugés) ho Komisaun Funsaun Públika (KFP).
Prezidente KFP, Faustino Cardoso, hateten proposta lei autorizasaun lejislativa atu define idade másimu serbisu efetivu iha funsaun públika.
“Inisiativa ne’e Governu hato’o proposta lei husu autorizasaun hosi Parlamentu Nasionál bainhira hetan ona autorizasaun mak Governu bele avansa liuhosi instrumentu legál apropriadu kontestu Governu nian mak dekretu lei ne’e define limite idade másimu serbisu efetivu iha funsaun públika”, Prezidente KFP ba jornalista sira hafoin audénsia iha PN, kinta ne’e.
Nia hatutan, pedidu autorizasaun lejislativa mai iha PN tanba definisaun idade limite serbisu efetivu ne’e liga ho direitu ema ida nian. Tuir proposta Governu nian define idade 60 presiza reforma ona ho obrigatóriu.
“Diskusaun nivel ohin iha komisaun, liuliu haree kona-ba periódu esepsionalidade ba sira ne’ebé idade 60 ne’e obrigatóriu tenke hato’o ona rekerimentu ba reforma”, esplika.
Hodi nune’e fó fali espasu tempu ba joven sira tanba populasaun dominante besik 70% joven ho idade 30 mai kraik.
“Ita hakarak juveniliza funsaun públika halo sai joven liu-tán hasa’e produtividade serbisu, signifika ita tenke loke odamatan”, katak nia.
Tuir dadus hosi KFP dadaun rejista funsionáriu públiku ho idade reforma 60 ba leten hamutuk 3441, númeru ne’e 60% hanesan professór ka manorin nain sira hosi Ministériu Edukasaun Juventude Desportu (MEJD).
Sorin seluk, Prezidente Komisaun A, Joaquim dos Santos ‘Boraluli, konsidera autorizasaun lejislativa ne’e importante tebes, nune’e audénsia ne’e atu rona hanoin hosi parte Governu.
Ho ida ne’e bainhira audénsia ramata komisaun sei halo relatóriu pareser hodi envia ba meza PN hodi ajenda ba diskusaun tuir mai.
Notísia relevante: PN baixa lejislativa limitasaun idade reformadu FP ba komisaun A
Jornalista : Nelson de Sousa
Editora : Rita Almeida
