DILI, 06 outubru 2022 (TATOLI)—Tenente Jenerál Reformadu, Lere Anan Timur, kinta ne’e, halo vizita ba Prezidente Repúblika (PR), José Ramos Horta, hodi informa nia partisipasaun iha vida polítika.
“Ha’u ohin mai hasoru Prezidente Repúblika, atu informa ha’u-nia situasaun no hakarak mós rona situasaun mundu nian ne’ebé durante ne’e Prezidente halo vizita. Kona-ba ha’u-nia situasaun, ha’u agora atu halo tinan-ida sai polítiku, ida-ne’e dezafiu boot ida ba ha’u maibé ha’u konfia ha’u-nia an, nune’e ha’u husu Prezidente Repúblika no líder hotu hanesan Xanana, Taur nia apoiu ba ha’u-nia kareira polítika ne’ebé agora ha’u la’o,”Lere Anan Timur, hateten, hafoin vizita PR iha Palásiu Prezidensiál, Bairru-Pité.
Notísia relevante: Lere husu Governu kontrola didi’ak arte-marsiál
Nia dehan, kareira polítika ne’ebé daudaun ne’e nia assume la’ós kareira foun ida ba nia, tanba durante tinan-24 nia-laran, nia iha polítika militár no agora mak sai polítiku loloos de’it ona, militár laiha, nune’e nia parte rona no husu apoiu ba líder polítiku sira.
“Informasaun kona-ba mundu nian, Prezidente Repúblika forma situasaun iha mundu hanesan nasaun sira ne’ebé ajuda ita ba dezenvolvimentu nian iha rai-laran situasaun tenke hakmatek tanba situasaun hakmatek mak bele dezenvolve ita-nia rai lae dezenvolvimentu la la’o ba oin,” Lere dehan.
Husu timor-oan serbisu iha rai-li’ur tenke ho dignidade
Iha biban ne’e, Tenente Jenerál Reformadu husu timor-oan sira ne’ebé bá serbisu iha rai-li’ur tenke ho dignidade tanba lori nasaun nia naran.
“Joven sira ne’ebé buka moris bá li’ur hanesan uluk no agora ha’u hateten, tenke bá ho dignidade, hela ema-nia rai ho dignidade no fila ho dignidade, ida-ne’e mak hamenus problema tanba ita ba lori nasaun nia-naran,” nia fó hanoin.
Aleinde ne’e, nia nota mós katak kona-ba konflitu, daudaun ne’e menus ona tanba timor-oan maioria buka moris iha rai-li’ur nune’e hirak ne’ebé sei iha rai-laran, ukun na’in sir tenke fó kampu traballu ba joven nune’e sira bele serbisu no kontribui ba dame.
“Situasaun agora, joven sira ne’ebé bá Portugál toba iha luron no laiha fatin, ida-ne’e haree ba dignidade nasaun nian problema. Governu sira tenke haree ba situasaun ne’e oinsá bele hetan solusaun tanba ba serbisu iha rai-li’ur ne’e la’ós foin ita mak halo maibé nasaun boot sira mós barak apreende esperiénsia iha ema-nia rai fila dezenvolve nia rai,” Tenente Jenerál Reformadu tenik.
Jornalista : Arminda Fonseca
Editora : Julia Chatarina
