iklan

HEADLINE, MUNISÍPIU, VIQUEQUE

MTK sosializa rede komunikasaun iha nível administrasaun munisípiu Viqueque

MTK sosializa rede komunikasaun iha nível administrasaun munisípiu Viqueque

Ekipa DNIK hasai foto hamutuk ho partisipante hafoin atividade sosializasaun iha salaun edukasaun, Beloi, kinta (07/10). Imajen Tatoli/Vitorino Lopes da Costa

VIQUEQUE, 06 outubru 2022 (TATOLI)–Ministériu Transporte Komunikasaun (MTK) liuhosi Diresaun Nasionál Infraestutura Komunikasaun (DNIK), kinta ne’e, halo sosializasaun durante loron-rua, kona-ba rede komunikasaun ba nível administrasaun munisípiu Viqueque.

“Objetivu atividade ne’e atu partilla knaar no serbisu Diresaun Nasionál Infraestutura Komunikasaun, nune’e entidade responsável sira bele hatene no koñese área infraestura nian. Aleinde ne’e atividade ne’e hodi resposável liña ministérial bele hatene área infraestura, nune’e ami fornese liña internet ba ajénsia Governu nian iha munisípiu ida-ne’e,” Diretór Nasionál Infraestutura Komunikasaun, Paulino Lopes, hateten ba Agência Tatoli, iha salaun edukasaun, Beloi, kinta ne’e.

Tuir Diretór, bainhira liña internet di’ak maka bele halo atendimentu lalais, ezemplu atu transfere dokumentu ruma velosidade lalais.

“Ami liuhosi diresaun nafatin prepara infraestutura hodi garante liña komunikasaun iha munisípiu Viqueque. Daudaun ne’e Governu sosa liña internet hosi empreza telekomunikasaun Telemor tanba operadór ne’e ninia infraestura di’ak. Governu sosa hodi distribui ba instituisaun Governu iha munisípiu,” nia akresenta.

Notísia relevante: APNIC no ANC realiza formasaun internet routing ba instituisaun Estadu

DNIK destaka ona funsionáriu ida hodi halo kontrola liña internet ne’ebé distribui ba munisípiu Viqueque.

Enkuantu, iha munisípiu ne’e diresaun sira ne’ebé uza liña internet hosi DNIK maka hanesan Administrasaun munisípiu Viqueque, Servisu Saúde Viqueque, Polísia Nasionál Timor-Leste (PNTL), Diresaun Servisu Ministériu Agrikultura no Peska (MAP) Viqueque no instituisaun sira seluk.

Daudaun ne’e, ekipa DNIK kontinua halo survey iha postu administrativu sira tanba iha futuru sei distribui liña ba postu administrativu sira.

“Tuir planu ba futuru ami sei distribui liña internet to’o postu sira no daudaun ne’e liña sei kobre de’it iha munisípiu seidauk to’o postu sira,” nia tenik.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!