DILI, 06 setembru 2022 (TATOLI)–Sekretáriu Estadu Juventude no Desportu (SEJD), Abrão Nokosiku Saldanha, enkoraja joven sira atu hadook-an hosi risku tabaku nune’e bele evita-an risku tabaku.
“Ha’u husu ba entidade hotu, Polísia, líder komunitáriu inklui ita sira hotu atu halo kontrola ba loja ka kios sira hodi informa ba negosiante sira katak lei bandu ona labele fa’an tabaku ka sigarru rahun, atu nune’e sira bele hatene,” Sekretáriu Estadu hateten hafoin ramata lansa programa divulgasaun informasaun kona-ba impaktu tabaku ba ema nia saúde no prevene moras la hada’et ne’ebé realiza iha salaun Universidade De Dili (UNDIL), Mascarinhas, kinta ne’e.
Tuir governante ne’e, programa divulgasaun informasaun kona-ba impaktu tabaku ba ema nia saúde no prevene moras la hada’et ne’e nu’udar sensibilizasaun ida atu hadook joven sira hosi risku tabaku ba ema nia vida liuhosi fatór risku non kontajioza hanesan hipertensaun no kurasaun ne’ebé maka bele halakon ema nia vida inklui risku seluk hanesan impoténsia.
Tanba ne’e, SEJD husu ba entidade hotu atu hamutuk ho Governu hodi halo kontrola ba tabaku ne’ebé maka daudaun fa’an la tuir lei.
“Papél ema hotu nia maka buka atu kontrola saúde ida-idak nian liuhosi dalan oinsá bele evita aleijaun no mate prematura tanba kauza hosi fuma tabaku. Ita hotu sei ajuda Estadu no Governu hodi hateten ba negosiante katak tenke fa’an tabaku depois tenke fa’an ba ema ne’ebé idade boot, labele fa’an ba labarik minoridade tanba ne’e kontra lei,” nia tenik.
Notísia relevante: MS estabelese ona sentru hapara fuma tabaku iha munisípiu tolu
Tanba ne’e maka SEJD hamutuk ho Ajénsia Nasionál Kontrolu Tabaku Timor-Leste, Prezidente Autoridade Munisípiu Dili, Polísia Nasionál Timor-Leste (PNTL) no Edukasaun hamutuk ho UNDIL hakarak divulga informasaun kona-ba lei sira ne’ebé ba komunidade atu implementa lei sira ne’ebé iha ona ho didi’ak.
“Komunidade sira presiza iha koñesimentu ba lei sira ne’e hodi bele kontribui ba implementasaun iha futuru. Ita iha ona instrumentu, iha ona lei no ita hasa’e ona taxa, maibé ita presiza haree nafatin medida hosi hasa’e taxa ne’e iha impaktu ka lae. Bainhira seidauk iha impaktu boot maka ita buka estuda tan medida seluk hodi bele hasa’e tan taxa ba tabaku ne’e rasik, nune’e ita bele minimiza no redús konsumidór tabaku ne’ebé maioria kuaze idade produtivu sira,” nia dehan.
Jornalista : Tomé Amado
Editora : Julia Chatarina
