OÉ-CUSSE, 06 outubru 2022 (TATOLI) – Universidade Nasionál Timor Lorosa’e (UNTL) no Institutu Nasionál Formasaun Dosente no Profisionál Edukasaun (INFORDEPE), kinta ne’e realiza yudisium ba profesór na’in-182 ho títulu baxarelatu iha Rejiaun Administrativa Espesiál Oé-Cusse Ambeno (RAEOA).
Profesór ho títulu na’in-182 ne’e hosi Fakuldade Edukasaun Arte no Umanidade (FEAH, sigla portugés), hosi Universidade Timor Lorosa’e (UNTL). Hosi na’in-182 ne’e komposta hosi mane 85 no feto 97 mai hosi ensinu pré-eskolár, ensinu báziku to’o sekundáriu.
Serimónia yudisium tinan ne’e ho tema ‘Edukasaun Tem Raizes Amargas, Mas os Seus Frutos São Dozes (Aristoteles)’ ne’ebé realiza ba dala 25 iha Timor-Leste.
Iha diskursu, Dekana Fakuldade Edukasaun Arte no Umanidade, Ana Cristina Silveira de Jesus Martins, konsidera kooperasaun UNTL ho INFORDEPE importante tanba lei baze edukasaun ezije ema atu sai profesór mínimu grau akadémiku tenke baxarelatu no másimu lisensiatura.
“Inísiu UNTL hosi FEAH hala’o kooperasaun ho INFORDEPE hahú iha 2007 tanba atu rezolve problema ne’ebé maka INFORDEPE enfrenta, tanba inísiu kuandu sira loke kursu sira-ne’e, maibé to’o finalidade tenke hetan rekoñesimentu grau akadémiku hosi universidade de’it mak bele fó títulu,” Ana Cristina Silveira de Jesus Martins, ko’alia iha ámbitu serimónia yudisium hala’o iha otél Ambeno, Oé-Cusse.
Nune’e Serimónia yudisium ne’e sai hanesan kultura universidade ka institutuisaun akadémika ida, bainhira estudante ida hahú no atu konklui tenke kumpre obrigasaun akadémika nian liuhosi prosesu naruk iha tempu estudu, to’o ikus estudante ida iha ona direitu atu simu atribuisaun ba títulu akadémiku ho grau baxarelatu edukasaun.
“Títulu ida-ne’e simu, persiza hatudu diferente tau aas, tenke hatudu karáter hanesan ema kualifikadu iha prosesu aprendizajen, iha buat neen importante tenke kaer metin, maka koñesimentu, abilidade, kompreensaun, karáter, onestidade no omília. Ida-ne’e xave importante ba imi atu sai profesór ida-ne’ebé sai modelu no ezemplu ba sira-ne’ebé seidauk hetan títulu edukasaun, nune’e imi bele hetan susesu iha prosesu aprendizajen,” nia katak.
Prezidente INFORDEPE, Manuel Gomes de Araújo, apresia ho esforsu durante estudu besik tinan-haat, bele hakat liu dezafiu oinoin hanesan serbisu saúde.
“Ha’u agradese entidade hotu tanba serbisu hamutuk konsege realiza formasaun ne’e to’o ohin loron bele hetan sira-nia rekoñesimentu ho títulu baxarelatu ba edukasaun nian,” nia orgullu.
Nia apela ba judisiáriu sira nafatin mantein knaar ho di’ak, iha domin, responsabilidade no sai nafatin ezemplu iha fatin hotu-hotu, nune’e kontinua pozisaun nu’udar inan-aman ba oan sira.
Diretór edukasaun RAEOA, Daniel Mauno, agradese ba UNTL tanba koopera ho Ministériu Ensinu Superiór, Siénsia no Kultura (MESSK) tulun ona profesór barak atu hasa’e tán koñesimentu iha formasaun profesór iha nível edukasaun.
“Ami agradese tebes ba estrutura UNTL tanba bele fó oportunidade ba Governu liuhosi MESSK ba INFORDEPE bele simu ami-nia proposta, UNTL nia duni mak bele fó solusaun, tanba liuhosi edukasaun formál MESSK koopera di’ak ho INFORDEPE ita hetan solusaun,” nia agradese.
Notísia relevante: Manorin kontratadu 184 iha RAEOA hahú halo estájiu pedagójiku
Jornalista : Abílio Elo Nini
Editór : Evaristo Soares Martins
