DILI, 07 outubru 2022 (TATOLI)–Membru Konsellu Populár Defeza, Repúblika Demokrátiku Timor-Leste (CPD-RDTL) hamutuk uma-kain 44 iha postu administrativu Venilale, munisípiu Baucau lakohi partisipa iha sensu uma-kain no populasaun 2022.
“Ha’u hakarak informa katak grupu CPD-RDTL balun mak partisipa liuliu iha munisípiu Ainaro no Baucau, maibé iha Venilale mak lakohi partispa hamutuk uma-kain 44 tanba sira dehan katak sira la hetan benefísiu hosi Governu no sira mak lakohi duni atu hetan,” Diretór Jerál Estatístika, Elias dos Santos, hateten ba Agência Tatoli, iha ninia knaar fatin, Caicoli, sesta ne’e.
Notisia relevante: PR husu públiku kontribui dadus loloos iha ámbitu sensu populasaun 2022
Grupu sira ne’e, sensu uma-kain no populasaun desde tinan 2010 to’o 2022 la partisipa, maski nune’e ekipa sensu sira nafatin hakbesik-an ba sira hodi enkoraja atubele partisipa.
“Ami buka maneira oioin hodi enkoraja sira partisipa, maneira ne’e mak liuhosi sira-nia Xefe suku, Administradór postu no Prezidente Autoridade. Hanesan timor-oan enkoraja sira atu partisipa hotu iha sensu uma-kain tinan 2015 iha suku Uaibobo, postu administrativu Ossu maioria la partisipa maibé sensu tinan ne’e sira partisipa,” nia akresenta.
Enkuantu, iha munisípiu Ainaro, grupu CPD-RDTL uma-kain hamutuk 50 maibé hosi númeru ne’e balun partisipa ona no sexta ne’e Diresaun Jerál Estatístika sei komunika ba ekipa kada munisípiu hodi komfirma grupu CPD-RDTL uma-kain hira mak la partisipa.
Sensu uma-kain no populasaun tinan 2022 realiza ona iha loron 05 setembru no ramata iha loron 05 outubru 2022.
Jornalista : Antónia Gusmão
Editora : Julia Chatarina
