OÉ-CUSSE, 07 outubru 2022 (TATOLI) – Ministru Ensinu Superiór, Siénsia no Kultura (MESSK), Longuinhos dos Santos, husu ba profesór na’in-182 ne’ebé simu ona graduasaun hosi Universidade Timor-Lorosa’e (UNTL) iha nivél edukasaun Fakuladade Edukasaun Arte no Humanidade (FEAH), atu asegura edukasaun ho kualidade ba labarik sira-nia futuru.
Graduadu na’in-182 ne’e komposta hosi mane 85 no feto 97 mai hosi ensinu pré-eskolár, ensinu báziku to’o sekundáriu, hafoin hala’o kursu espesializada iha formasaun espesializada ba profesór durante tinan tolu, liuhosi kooperasaun UNTL ho Institutu Nasionál Formasaun Dosente no Profisionál Edukasaun (INFORDEPE), tanba tuir lei baze ba edukasaun azije ema atu sai profesór mínimu grau akadémiku tenke baxarelatu no másimu lisensiatura.
Tan ne’e Ministru Longuinhos dos Santos, konsidera graduasaun ne’e sai hanesan momentu importante ba instituisaun ensinu superiór no sai espesiál liu tanba haree ba profesór sira iha Ministériu Edukasaun hetan asesu ba formasaun baxarelatu bele hetan susesu iha karreira dosente.
Tanba ne’e, serimónia ohin nian hanesan pasu importante tebes ba komunidade akadémika iha Timor-Leste espesiál iha RAEOA.
“Serimónia ohin nian signifika katak UNTL no INFORDEPE, liuhosi kualifikasaun dosente sira nian ne’ebé hala’o hela serbisu iha RAEOA, fó ona kontributu esensiál ida atu Timor-Leste bele hala’o objetivu sira hosi dezenvolvimentu sustentável mak importante tebes, tán ne’e husu ba profesór sira-ne’ebé mak ohin simu ona graduasaun nafatin asegura edukasaun ho kualidade ba labarik no foin-sa’e sira hotu nia futuru,” Ministru Longuinhos dos Santos, ko’alia iha ámbitu seremónia graduasaun iha hala’o iha otél Ambeno, Oé-Cusse, sesta ne’e.
Governante ne’e orgullu tanba ohin loron ksolok ba ba graduadu sira, no hato’o parabéns ba UNTL no INFORDEPE tanba ho kooperasaun no esforsu hodi reforsa investimentu ida ne’e konsentra ba formasaun inisiál no kontínua ba profesór sira, hodi tulun forma profesór sira ho kapasidade no kualifikasaun ne’ebé iha ona esperiénsia ensinu nian.
Tuir nia, hanesan lema hosi Ministériu Ensinu Superiór, Siénsia no Kultura hateten “A Qualidade da Formação é o Futuro da Nação.”
“Tanba ne’e, sai profesór hanesan oportunidade ida atu kontribui hodi muda ita-nia nasaun nia futuru liu hosi formasaun ba ita-nia rekursu umanu sira,” nia fó hanoin.
Governante ne’e informa, VIII Governu Konstitusionál entende katak komponente ida hosi komponente sira-ne’ebé estruturante liu iha misaun universidade públika nian, mak atu kualifika sistema nasionál ensinu nian, liuliu nível pré-eskolár, primáriu no sekundáriu, atubele halo ida-ne’e sai efikáz liután, maka liuhosi formasaun inisiál no kontínua ba profesór sira.
Misaun ne’e sai nu’udar kondisaun esensiál atu sistema edukativu Timor-Leste nian bele hatuur metin no alkansa sistema edukativu foun sira ho kualidade.
“Tanba ne’e ha’u hakarak hato’o parabéns ba Magnífiku Reitór UNTL nian no Prezidente INFORDEPE tanba investimentu ne’ebé halo ona iha formasaun ba profesór sira,” nia orgullu.
Nia fundamneta, área edukasaun nian mak sei kontinua laiha dúvida katak ramun ka komponente edukasaun nian importante hanesan integra iha universidade UNTL. Ida-ne’e atu reforsa tan katak, edukasaun ida ne’ebé inkluziva no ho kualidade hanesan dalan úniku hodi bele atinje dezenvolvimentu nasaun ida-ne’e nian.
“Tan ne’e atu garante futuru ba sidadaun sira-nian ne’ebé mai hosi rezultadu dedikasaun no dezempeñu hosi sira-nia profesór ensinu primáriu nian” nia hakotu.
Notísia relevante: Profesór kontratadu 182 hosi RAEOA gradua ho títulu baxarelatu
Jornalista: Abílio Elo Nini
Editór: Evaristo Soares Martins
